Криминалот во Бугарија е надвор од контролата

Подметнатите експлозии и нарачаните убиства не ги растревожија управувачите, но тепањето еден пратеник ги натера да размислат

АИМ Софија, 01.0 2. 2001

Во Бугарија не постои гангстерска војна, отсечно изјави министерот за надворешни работи Емануил Јорданов на 26 јануари, само два дена по спектакуларното убиство на скандалозно познатиот бизнисмен Емил Димитров, со прекар Макарона, чија фирма "Унисон" беше бозната како голем производител на пиратски компакт-дискови.

Само еден ден по егзекуцијата на Макарона - поранешен партнер на Жељко Ражнатовиќ -Аркан кој го префрли призводството на компакт-дискови во Црна Гора, паднаа новите жртви на гангстерската војна во Бугарија. Во Варна е убиен тамошниот "нарко-бос" Георги Георгиев, со прекар Рахита, кој беше близок на групата ТИМ. Софискиот бизнисмен, сопственик на финансиската куќа "Титан 21 век" Георги Ѓошев е убиен во Пловдив. Неколку дена порано од бомба беа парчосани Добрин Кафеџиев - Кафето и Диме Колев - Чирпан од Бургас, кои беа поврзани со криминалната група СИК. Пеколната направа со далечинско управување била наменета на нивниот шеф - Пламен Дишков -Кела , кој се извлекол само со скршена нога - засега.

Од август минатата година досега, значи веќе половина година, на приморјето се пука како во вистинска војна. Четири експлозии уништија автомобили и станови на луѓе од СИК во Русе, а на 16 јануари во Варна се ранети двајца полицајци, од кои еден им подлегнал на повредите. На 22 јануари бомба парчосала двајца луѓе пред еден ноќен бар во Бургас.

Во Софија, во месец август, "филозофот" Пантју Пантев - Поли е нападнат со минофрлач, но убијците биле невешти во ракувањето со такво оружје, па тоа го спасило. Во врска со тој атентат се зборува за трговија со дрога на големо, за неплатени испораки.

Меѓутоа,по нападот со минофрлач во круговите на таканаречените поранешни силеџиски групи завладеа нервоза. "Босовите" почнаа меѓусебно да се демнат, го зајакнаа своето обезбедување. И не без причина. На 22 ноември минатата година експлодираше "мерцедесот" на потпретседателот на компанијата "ВАИ"( поранешна ВИС-2) Николај Цветин - Близнак.

Шефот на истата компанија Георги Илиев, се уште не настрадал. Можеби тоа го охрабрува да работи што сака. На 11 октомври тој, со уште десетмина вооружени свои луѓе, упаднал во ресторанот "Блад", сопственост на поранешната група "Дескрим" на Славе Бинев, и го претепал сопственикот пред сите присутни, ги исплашил до смрт посетителите, а потоа мирно го напуштил ресторанот.

Домашната гангстерска војна го премина националното ниво со смртта на Ерменецот Арташес Тер Овсепјан и Русинот Александар Романов, кои одлетале во воздух од експлозија во нивната хотелска соба во луксузниот хотелот "Амбасадор", на 15 октомври минатата година. Непосредно пред Нова година експлодирал џипот на Диме Рус. Очигледно е дека односите меѓу поранешните силеџиски "босови"не се добри и дека имаат уште што да делат и да распределуваат. Меѓутоа, што уште треба да се случи за барем МВР да признае дека гангстерска војна сепак постои и дека бандитите непречено си ја вршат својата работа. Можеби требале да претепаат некој пратеник? И тоа се случи - истиот ден кога министерот Јорданов објаснуваше дека не се работи за гангстерска војна, туку за " неколку сторени тешки криминални дела во краток временски период", во центарот на Софија го претепаа пратеникот на владејачкиот Сојуз на демократските сили (СДС) и претседател на парламентарната Комисија за надворешна политика Асен Агов, додека по улица го шетал својот пес.

Дури по овој случај реагираа владејачките политичари. СДС излезе со декларација во која тој акт се квалификува како провокација за сите народни пратеници и институции во Бугарија. Како дотогашната "парада" на бандитите да не беше провокација. Но што се некои 160 подметнати експлозии во текот на минатата година кога не биле вперени против политичарите. Што ако се стрелало од минофрлачи, што ако во воздух летале џипови и мерцедеси, што ако бомби уривале автокуќи, што ако ограбиле филијала на банка во центарот на Софија или киоск на спортска прогноза во Плевен - ако никој од народните пратеници не настрадал.

Освен тоа, според владиниот извештај за 2000 година, кој е објавен на Интернет, во неговиот дел кој се однесува на внатрешниот ред и мир, сликата е сосема поинаква. Порастот на криминалот во изминатата година е само 4,7 проценти, се пофали министерот Јорданов. Во тој извештај може да се најде нешто мошне интересно: во првото полугодие минатата година расветлени се 33 случаи на поткупување. Оваа бројка буквално предизвикува смеа, бидејќи добро е познато дека само една полициска патрола во текот на една ноќна смена прима барем 33 поткупувања.

Доколку сепак мора да се сумира она што моментално се случува во Бугарија во поглед на безбедноста, би звучело вака: Ем пукаат, ем прислушуваат. Неодамна се дозна дека во последните две години се издадени дозволи за прислушување на 300.000 Бугари. Меѓутоа, фактот дека само стотина лица се изведени пред суд благодарение на, на тој начин, собраниот доказен материјал предизвикува некои тажни алузии на времето од пред 1989 година. Се создава впечаток дека државата сосема самоволно упаѓа во домовите на луѓето и во нивните спални соби.

Во меѓувреме, стана јасно дека криминолозите располагаат со најмал број на уреди за прислушување. Тогаш, каква е намената на таканаречените "бубачки"? Можеби да се дознае нешто од дипломатите во Софија? Меѓутоа, на сите им е јасно дека оваа категорија на луѓе одлично знае што и како да каже во слушалката, а што да премолчи. Тогаш?

Додека во МВР го пишуваа својот извештај за 2000 година , речиси 750 мажи, жени, деца и стари лица станаа жртви на убиства. Во минатата година се забележани 139.000 криминални дела, што значи дека секојдневно се случуваат 380 убиства, кражби, силувања, напади, измами, експлозии. За споредба, во текот на таканаречената гангстерска војна во Бугарија во 1994 година одземени се 499 човечки животи, а спроти промените 1989 година - 188. Речиси иста е статистиката и кај провалните кражби и украдените автомобили.

Меѓутоа, сето тоа се само "ситници" на кои ниту силеџиските групи ниту МВР не им обрнуваат некое посебно внимание. Меѓутоа,овие "ситници" се очигледно дел на гангстерската војна која сепак постои, без оглед на уверувањата на министерот Јорданов. Кои се, меѓутоа, причините за таа војна?

Доколку прифатиме дека бугарското подземје е одраз на политичката состојба во Бугарија, би можеле да разјасниме многу работи. Се наближуваат изборите, па можеби токму тука лежи вистината. Секоја политичка формација има свои "фаворити" меѓу групите кои се движат на работ од законот. Тие меѓусебно се финансираат, сметаат познавачите на валканите задкулисните игри. Едни плаќаат за политичкиот чадор и за спокојството, другите тоа едноставно им го обезбедуваат. Заради тоа и се пожестоката гангстерска војна не би требала за никој да биде изненадување. Сега за силеџиските групи нема ништо поважно од нивната иднина по изборите. Тие даваат се од себе за да дознаат во кого да вложат и на кого да му платат.Во таа нејасна ситуација тие војуваат едни против други за да освојат подобра појдовна позиција, сметаат набљудувачите на тие процеси.

До изборите во јуни сепак има уште доста време. Доколку во државата се пука и трешти со исто темпо како и досега, состојбата ќе стане, навистина, без секаква контрола. Во тоа расфрлање со оружје би можеле да настрадаат и невини луѓе. Како што тоа се случи на 30 јануари,на полноќ, кога среде Софија ја убија 16-годишната ученичка Елеонора Димитрова.

Никој, ниту од редовите на владејачките сили, ниту од опозицијата во Бугарија, не оспорува дека МВР треба да ги фаќа бандитите, обвинителството и истрагата да собираат докази и да ги обвинат, а судот да ги суди. Меѓутоа, дали треба да истепаат уште некој пратеник додека се шета со својот пес? Ако тоа би помогнало, тогаш Бугарите се согласуваат.

АИМ Софија

ПЛАМЕН КУЛИНСКИ

Съдържаниет е скрито
Влезте за да го видите