|
Царската Библија „Дневник“ и' ја предаде на Националната библиотека
Вредната книга е изложена во фоајето на Библиотеката, а експерти ќе ја истражуваат врската со Охридската книжевна школа
Библијата од пред неколку века, која според одликите ја класифицираа во редот на царски книги, вчера „Дневник“ ја предаде во Националната и универзитетска библиотека „Св. Климент Охридски“, каде што е изложена за посетителите. Ретката и вредна книга, на директорот на Универзитетска библиотека, Борко Зафировски, му ја предаде Катерина Блажевска, главен и одговорен уредник на „Дневник“, која, меѓу другото, рече дека е значајно да биде откриен патот по кој оваа книга од московската типографија стигнала во Македонија.
- Сакаме Националната библиотека да го истражи ова дело и да го направи достапно за јавноста во земјата. Апелираме до институциите во државата да се грижат уште повеќе за нашите национални богатства. Се' што е најдено на нашата територија, тука треба и да остане. Треба да се следи овој пример за да ги зачуваме културните вредности што ни припаѓаат на сите нас - рече Блажевска.
За директорот на НУБ, Борко Зафировски, подарокот од „Дневник“ е убав и несекојдневен гест за Библиотеката што доаѓа во вистинско време и има големо значење.
- Библијата ќе придонесе и во изучување на старословенскиот јазик и култура, кои се значајни за нашата историја. Овој гест треба да биде сфатен и како апел до јавноста да ги евидентираме и зачуваме сите вредности што постојат во земјата. Библиотеките се центар на граѓанската демократија и култура и тие се вистинското место за чување на културните вредности - рече Зафировски.
Книгата потекнува од 1784 година, печатена е на старословенски јазик во Москва, има 3.000 страници, тешка е седум килограми, има дрвени корици обложени со кожа. Во изминатите три века била сопственост на старо македонско семејство од Кочани, кои поради сиромаштија ја огласија на продажба.
Во Библијата се поместени сите текстови од Стариот и од Новиот завет, на кои се додадени и стотина илустрации со мотиви од христијанството и од Русија од 18 век.
На корицата, со букви на старословенско писмо, се врежани црковни зборови, а пред страниците со библиски текстови има запис во кој стои името на објавувачот на Библијата и годината кога таа била отпечатена во Москва.
Специфика е големиот формат 43 на 23 см, што упатува дека се работи за царско Свето писмо.
Со донацијата на древната книга, книжниот фонд на Библиотеката ќе биде збогатен со уште еден вреден споменик за историјата и развојот на словенската култура и писменост. Со споредбена анализа ќе се утврдува македонската редакција на изданието и влијанието од Охридската книжевна школа.
Експерти од Универзитетската библиотека веќе ја прегледале книгата и се согласиле дека таа е вистинско богатство што не смее да се дозволи да биде изнесено во странство. Библијата во НУБ ќе биде заштитена од влага, пожари и од кражби и ќе биде изложена во фоајето на Библиотеката.
Виолета Мартиновска, проучувач на старата литература, рече дека Библијата има големо значење зашто таа е едно од ретките старословенски печатени документи што на едно место ги содржат и Стариот и Новиот завет.
- За наша среќа, ова Свето писмо е комплетно зачувано. По начинот на кој е изработена, таа е царско Свето писмо, кое има и религиозно, но и научно значење. Начинот на кој е изработена Библијата има посебна симболика во себе, која набрзо ќе ја проучуваме и ќе ја истражуваме. Големо е значењето зашто со книгата ќе можеме да ги споредуваме и ракописите од богатата старословенска традиција што ни ја оставија Кирил и Методиј - рече Мартиновска.
Во книгата има и стотина илустрации со мотиви од христијанството и од Русија од 18 век. На корицата, со букви од старословенското писмо се врежани црковни зборови. Како и во повеќето стари црковни книги, пред страниците со библиски текстови има текст во кој стои името на објавувачот на Библијата, како и годината кога таа била отпечатена во Москва
|
Библија.......... [re: Dunek_Lozar]
