Само кога е топло , кога се имаат пари ........... и во лето , тогаш е Ерусалим ?

„Лоша туристичка сезона за Охрид“


Охрид
Градот и плажите во септември се празни и покрај убавото време
Вчера заврши летото, што е време за оценка на туристичката сезона во Македонија, која во голема мера е сконцентрирана во Охрид.

И оценката на туристичките работници во градот е дека сезоната беше - катастрофална!

Како причини се наведуваат светската економска криза, како и лошото време во јули.

Охрид, среде септември е празен. Иако временските прилики не се лоши, по чаршијата може да се забележи само по некој странец, а сите останати се локалните жители.

Хотелиерите и туристичките работници од градот велат дека не паметат послаба туристичка сезона од годинешнава.

Сметаат дека споредено со минатите години, имало и до 50% помалку гости. Перо Кутановски, менаџер на хотелот „Гранит“, е видно незадоволен.

-„Првиот бран гости во сезоната комплетно беше испуштен. Почеток на сезоната се пролонгира за почетокот на август, а во јули почнаа најавите. Катастрофално беше, бидејќи сезоната е главен извор на работа за хотелите. Гостите од Србија не изостанаа бидејки тие и оваа година ја покрија сезоната, како и гостите од Косово, од Албанија и од Бугарија, кои во поголем дел доагаат во приватниот смештај. Чартер превозот е главен проблем за полнење на Охрид по и пред сезона.“

Најавеното укинување од 1 јануари на визите ги израдува граѓаните на Македонија, Србија и Црна Гора, но ги загрижи туристичките работници во Охрид.

Перо Јакимовски, кој повеќе од 30 години е во туризмот, смета оти сега, наместо во Охрид, секој ќе посака слободно да отпатува на неколку дена во некоја европска метропола:



-„Предизвикот ќе биде голем кај сите и кај нас и кај Србите и кај останатите. Претпоставката е дека дел од овие гости кои доаѓаат ќе сакаат првата, втората година да одат надвор, бидејќи нема да чекаат во редови за виза. Моја претпоставка е дека ние наредната година, ако не сториме нешто со многу посилна промоција и да бидеме поорганизирани, ќе ни се случи ова.“

Грижи

Кај туристичките работници има загриженост дека бродската несреќа во која загинаа 15 бугарски државјани ќе биде причина и Бугарите да не доагаат во толку голем број како до сега.

Ѓоко Ѓоршевски е туристички водич кој работи само со групи од Бугарија. Тој вели дека засега се’ е во ред:

-„Цел септември и октомври се резервирани и за сега нема никаква најава дека нема да доаѓаат. Пред два дена имав две групи со бугарски гости. Жалат за несреќата но го сакаат Охрид и ке продолжат да доаѓаат овде. За сега не сакаат да се возат со брод.“

Концесионерите на плажи пак кажуваат оти претходните лета и во септември не можело да се најде слободна лежалка:

„Ќе не’ јаде волкот ако вака се однесуваме кон туризмот, бидејки не сакаме да сфатиме дека ние охриѓани живееме и ќе живееме од туризам. Секоја година има причина што Охрид ги губи гостите. Оваа година требаше да сфатиме дека треба да се прилагодиме со цените. Имаше покачување на цените по одредени ресторани и плажи.“

Съдържаниет е скрито
Влезте за да го видите