ОМО - Илинден / Наука / Хуманитарни науки / История

Валкани игри на Софија за регистрацијата на ОМО „Илинден“ - ПИРИН

Бугарската власт на членови на партијата на Македонците им се заканува со затвор

ВИКТОР ЦВЕТАНОСКИ

Бугарските власти вршат голем притисок врз членови на ОМО „Илинден“ - ПИРИН и измислуваат валкани игри за да не ја регистрираат партијата на Македонците. Претставници на обвинителството, на финансиската полиција и локални полицајци влегувале во нивните домовите и притоа им се заканувале, барајќи да се откажат од партијата. А ако не го направеле тоа, ги предупредувале дека можат да бидат судени.

„Како што не' информираа повеќе наши членови од Пловдив, Пештера, Гоце Делчев, Банско и од други места, во нивните домови влегувале по четворица претставници на власта и најпрво ги прашувале дали се членови на ОМО „Илинден“ - ПИРИН, и откако ќе добиеле потврден одговор, барале да им кажат дали знаат дека партијата била забранета и дека се борела за отцепување на Пиринска Македонија од Бугарија, што е ноторна лага“, вели Стојко Стојков, еден од копретседателите на партијата на Македонците во Бугарија.

[Власта бара од членовите на ОМО „Илинден“ - ПИРИН да се откажат од партија, а ако не го направат тоа, им се закануваат со суд, вели Стојко Стојков] Откако ќе го спровеле однапред подготвеното сценарио на заплашување и притисок, претставниците на бугарската власт од членовите на ОМО „Илинден“ - ПИРИН барале да потпишат дека тие никогаш не поднеле барање да станат членови на партијата на Македонците. А ако не го направеле тоа, им се заканувале дека за тоа можат да бидат судени. „Ние немаме ништо против државата да ги провери пристапниците на членовите на нашата партија, но не се согласуваме врз нив да се врши таков притисок и да им се закануваат до судења“, додава Стојков.

По сето што се случува последниве денови, вчера Претседателството на ОМО „Илинден“ - ПИРИН одржа итен состанок за да ја разгледа новонастанатата ситуација и да направи договор што да преземе по големите притисоци што ги вршат бугарските власти за нивната партија повторно да не се врати на политичката сцена. Тие знаат дека се немоќни против власта, затоа ќе ги информираат меѓународните институции за правата на човекот.

Откако Стразбур ја поништи одлуката на бугарскиот Уставен суд, кој ја забрани ОМО „Илинден“ - ПИРИН, членовите на ова партија беа изложени на сизифовски маки. Според бугарскиот закон, за одново да ја регистрираат партијата требаа да соберат 5 илјади потписи, иако европските невладини институции сметаат дека ОМО „Илинден“ - ПИРИН автоматски треба да биде регистрирана, зашто како партија таа веќе била еднаш заведена во списокот на партии.

За време на собирањето на пристапниците на членовите, раководството на партијата на Македонците наиде на однапред подготвено сценарио од софиската ВМРО кое подоцна го спроведуваа органите на власта. ОМО „Илинден“ - ПИРИН беше обвинувана дека купува потписи и за членство во партијата плаќа по 50 евра, нешто што на многумина им изгледаше смешно, зашто во партијата на Македонците членуваат сиромашни луѓе, кои држат до своето национално чувство. Истовремено се измислуваше дека партијата зачленува малолетни лица, дека на нејзините списоците има починати луѓе и секакви други небулози, се со цел на власта да и' се даде можност да го малтретира раководството и членството на партија. За да го заплаши членството да не пристапува кон партијата, Обвинителството врз пријави на националистичката ВМРО поведе и две истраги во Гоце Делчев и во Сандански.

На таквите истраги и лажни обвинувања раководството на ОМО „Илинден“ - ПИРИН не можеше да се изначуди, зашто тие беа смешни и наивни. Иван Сингартиски, лидер на партијата, вели дека тие немале пари да платат за бензин за автомобилите, а не да даваат по 50 евра и да купуваат потписи од Роми, како што тврделе луѓе на партијата на Красимир Каракачанов. Тој додава дека однапред биле свесни дека ќе им накалемуваат такви нешта за да не ја регистрираат партијата. И токму поради тоа наместо пет илјади, собрале близу шест илјади пристапници.

Минатата седмица во Софискиот суд беше одржана расправа околу регистрацијата на партијата во која учествуваше и претставник на Бугарскиот хелсиншки комитет, кој цврсто стои зад партијата на Македонците. На 1 ноември судот треба да каже дали ќе ја регистрира ОМО „Илинден“ - ПИРИН или не. Неговото раководство се надева дека судот нема да подлегне на притисоците и дека Бугарија, која за неколку месеци ќе стане членка на Европската унија, конечно и за Македонците ќе стане демократска држава.