ПО ПОВОД 60 ГОДИНИ ОД АСНОМ
Помош за паднатите споменици од НОБ
Министерството за култура им даде приоритет на четири спомен-обележја кои повеќе години беа во многу лоша состојба
Одбележувањето на 60-годишнината од одржувањето на АСНОМ годинава е повод за Министерството за култура да финансира санација на четири споменици на културата од НОБ и меморијални објекти, кои повеќе години беа во многу лоша состојба.

Екипа од Републичкиот завод за заштита на спомениците на културата речиси месец и половина работат на санација на мозаикот во Споменикот на НОБ во Кичево. Други тимови деновиве почнаа да работат на Споменикот на слободата кај Кочани, на спомен-костурницата во Велес и на партизанската печатница во реканското село Битуше.

Според Милан Ивановски, директор на Републичкиот завод, мозаикот на споменикот кај Кочани, дело на Глигор Чемерски, речиси е завршен. Останало уште да се излие на плоча и да се врати на матичната позиција.

Проблеми имаат и другите два споменика во Кичево и во Велес, вели Мирјана Димовска-Чоловиќ, главен конзерватор за архитектура во Републичкиот завод. Во Велес треба да се санира изолацијата и да се врати покривната конструкција во првобитната состојба. Таа е во форма на школка и е распукана. И на костурницата во Кичево треба да се санира покривот - да се поплочи покривот и да се вратат на него мермерните плочи и релјефот.

- Со години баравме пари од Министерството за култура за да ги санираме спомениците од НОВ. Секоја година стојат барањата во Министерството, но секогаш има поприоритетни објекти што треба да се завршат. Годинашниот јубилеј го искористивме токму овие објекти да бидат приоритетни. До прославата има уште еден месец. Ако треба ќе работиме и втора смена, но тие ќе бидат санирани дотогаш - вели Димовска-Чоловиќ.

Екипа работи и на санација на партизанската печатница во Битуше. Таму имало проблем со прокиснување на покривот, предизвикан пореди неодржување на објектот. Според Димовска-Чоловиќ, тоа ќе се санира во најбрз рок, а потоа ќе се обнови поставката

Спомен-костурницата во Велес е изградена во 1979 година. Мозаиците со површина од околу 200 квадратни метри ги изработил уметникот Петар Мазев. Споменикот на слободата кај Кочани е изграден на почетокот на осумдесеттите години во минатиот век.

Съдържаниет е скрито
Влезте за да го видите