Светскиот сервис на БиБиСи ги објави плановите да отвори телевизија на арапски која треба да почне да емитува во 2007 година, во прво време со 12 часа програма дневно.
За да се подмират трошоците, радиото на Светскиот сервис престанува да емитува на 10 јазици, повеќето од поранешните комунистички држави во источна Европа.
Тоа се словенечката, хрватската, полската, чешката, словачката, унгарската, грчката, бугарската редакција, плус казачката и тајландската.
Во европскиот регион остануваат македонската, српската, албанската и романската редакција.
Шефот на Светскиот сервис Најџел Чапмен изјави дека ова е најголемата трансформација откако БиБиСи почна да емитува за странство пред 70 години.
Тој рече дека телевизијата сега е доминантен медиум за вести кој врши најголемо влијание.
Промените се дел од поголемите мерки за преструктуирање.
БиБиСи реши да затвори 8 од постоечките 12 европски јазични редакции, како дел од широката реорганизација на програмите што се емитуваат во странство.
Историјат
Нашиот аналитичар Јан Репа фрла поглед на историјата која почна во 1930-те.
Јазичните програми на БиБиСи за Европа се родија од борбата против германскиот нацизам и италијанскиот фашизам, како и од судирите со Советскиот сојуз за време на „студената војна".
Емитувањето на англиски јазик за странска публика почна во 1932-та и беше насочено главно кон слушатели во Австралија, Канада и Нов Зеланд, во обид да ги уверат да останат во рамките на Британската империја.
Во 1933-та во Германија на власт дојдоа Германците, подоцна почна Втората Светска војна, а БиБиСи почна да емитува на германски, италијански, француски, шпански и португалски.
Како што германската воена машинерија се ширеше низ Европа, БиБиСи емитуваше и на полски, чешки, словачки, унгарски, холандски, српско-хрватски, албански.
По војната, БиБиСи имаше програми на 45 јазици.
Хју Грин, кој подоцна стана генерален директор - вака ја објасни уредувачката философија: „ако не слушнат како искрено говориме за нашите порази, слушателите ќе ни веруваат кога ќе зборуваме за победите".
Нови предизвици
Емитувањето низ Европа се соочуваше со нови предизвици.
За разлика од американското радио Либерти и Радио Слободна Европа, БиБиСи не беше пропагандна станица.
Основата остана да биде, на слушателите да им се дадат фактите, а тие самите да извлечат заклучок.
Јазичните редакции во БиБиСи се отвораа и се затвораа.
|