Ѕвездомир Стефанов ВисулЧев НАЈАВУВА СУДСКА ПОСТАПКА
Сликите или станот на Кераца Висулчева ги бара нејзиниот син
Ѕвездомир Стефанов Висулчев сака да го задржи станот од 99 квадратни метри (што државата и' го додели на сликарката да го користи до крајот на животот), за да го зачува во автентична состојба и да го адаптира во спомен-куќа за неговата мајка
Синот на познатата сликарка Кераца Висулчева ќе поведе судска постапка за да му ги вратат сликите што неговата мајка пред смртта и' ги остави на Македонија, ако не му го препишат општествениот стан во скопската населба Аеродром во кој неколку години живееше неговата мајка. Ѕвездомир Стефанов Висулчев, постариот син на Висулчева, би сакал да го задржи станот од 99 квадратни метри за да го зачува во автентична состојба и да го адаптира во спомен-куќа за неговата мајка. Тој цел месец барал прием во Министерството за култура, но никако да се сретне со министерот Благој Стефановски ниту со некој негов соработник. Стефанов Висулчев, кој се' уште ги има клучевите од станот и го користи кога престојува во Скопје, поднел барање до Министерството за култура, до претседателот Бранко Црвенковски и до премиерот Владо Бучковски да се реши сопственоста во негова полза.
- Ако некој во Македонија го почитува делото на мојата мајка и донацијата од неколку стотици слики што и' ги подари на земјата што ја чувствуваше како единствена своја татковина, треба да го одобрат моето барање - вели 74-годишниот Стефанов Висулчев.
ЦЕЛ ЖИВОТ И ПОМАГАВ НА МАЈКА МИ
„Тоа го барам како државјанин на Република Македонија за да го сочувам творештвото и домот на истакнатата уметница со која бевме едно семејство. Преку целиот тежок и сложен живот толку бев сврзан со мајка ми што не создадов свое семејство. Моја беше иницијативата, организацијата и реализацијата на идејата мојата мајка да се пресели и да и' го подари на Македонија целото свое творештво. Сето тоа беше тајно организирано, без знаење на бугарските власти, кои се противеа на таа намера, и на брат ми, кој не се чувствува како Македонец. Мајка ми, како патриотка се откажа од македонска пензија, а јас бев принуден да ја издржувам до крајот на нејзиниот живот. Постојано доаѓав од Софија да и' носам пари и да и' помагам. Таа, како бездомничка-бегалка од Егејска Македонија, беше многу благодарна за станот што го чувствуваше како свој. Ако биде одбиено моето барање решението за станот да биде издадено на мое име, ќе бидам принуден, како законски наследник, да поведам судска процедура за враќање на оставнината на мојата мајка во моја сопственост, зашто тоа е наше заедничко дело“, пишува тој во барањето.
САКАА САМО ДА ГИ ЗЕМАТ СЛИКИТЕ
Стефанов Висулчев е револтиран што никој од Министерството за култура не го примал на состанок да поразговараат за неговото барање. Тој живее во Софија и неколкупати доаѓа во Скопје за да се обиде да го реши својот проблем.
- Како да не бидам лут! Тоа е скандалозно! Сите беа тука кога беше жива, додека не ги зедоа сликите. Некои од политичарите дури со лажичка ја хранеа кога беше во геријатрија. Сега никој не сака да ме прими - вели тој.
Стефанов Висулчев вели дека пред една година за проблемот зборувал со поранешниот претседател Киро Глигоров. Тој му објаснил дека е комплицирано да му го препишат станот, бидејќи зградата била наменета за службеници од Министерството за надворешни работи.
- Додека беше жива мајка ми, ми раскажуваше дека неколкупати непознати луѓе и' ѕвонеле на врата и ја прашувале до кога ќе биде во станот. Се плашеше - вели нејзиниот син.
Тој кога престојува во Скопје го чисти и го средува станот, за да ги зачува сликите и предметите што се останати автентични како во последниот ден кога сликарката го напуштила и заминала на лекување во Болницата за стари лица во Ѓорче Петров.
СНЕМАЛО ДВЕ СЛИКИ ОД СТАНОТ
Стефанов Висулчев тврди дека нема две слики од неговата мајка што биле во станот во Аеродром. Тој не знае каде се двете дела, ниту кој ги зел. Тврди и дека со министерот за култура Благој Стефановски се договорил кога сликите ќе бидат изложени во Сарајот во Ресен, станот ќе биде препишан на негово име, но не потпишале никаков документ. Засега единствен валиден документ е решението на Комисијата за станбени прашања на Владата на Македонија, во кое пишува дека станот и' е доделен на Кераца Висулчева на доживотно користење. Сепак, нејзиниот син, кој има македонско државјанство и лична карта издадена на адреса на тој стан, смета дека треба да му биде препишан нему.
- Не знам зошто никој не сака да го реши проблемот. Зошто сега на овој начин ја третираат мајка ми која, додека беше жива, доби две писма од тогашниот претседател на Америка, Џорџ Буш Постариот. Од почит таа му посвети слика што ја чувам и кога ќе воспоставам контакт со него, ќе му ја подарам - вели Стефанов Висулчев.
Кераца Висулчева почина во јануари 2004 година. Родена е во април 1919 година во селото Нестрам, Костурско. Во 1995 година дефинитивно се пресели од Бугарија во Скопје. Пред својата смрт, сите свои дела и' ги подари на Македонија.
Весна Ивановска
““
1829 год- ЮРИЙ ВЕНЕЛИН
|