КАКО НÈ ГЛЕДА ИСТОЧНИОТ СОСЕД?
За Бугарите нема никаква дилема дека Македонците се Бугари
Бугарскиот европарламентарец Евгениј Кирилов, познат по антимакедонските ставови, нарачал истражување на јавното мислење во Бугарија во однос на Македонија. Резултатите покажуваат дека добропознатите стереотипи на релацијата Македонија – Бугарија се и те како уште присутни, што веруваме само ќе му даде уште поголем поттик на Кирилов да ја продолжи таквата политика во Брисел.
Бугарите и натаму се уверени дека Македонците се неосвестени Бугари, дека нема влегување во ЕУ без потпишување договор за добрососедство, дека нема Македонци во Пиринска Македонија, дека македонските власти го поттикнуваат антибугарското расположение во државава...
По нарачка на европарламентарецот Кирилов, АФИС, агенцијата за социјални и маркетинг-истражувања од 22 до 26 ноември спроведе теренска анкета за ставот на граѓаните на Бугарија за пристапувањето на Македонија во ЕУ.
52 отсто од Бугарите сметаат дека ЕУ треба да се проширува со нови членки, но секој четврти Бугарин смета дека проширувањето треба да запре. За државите од Балканскиот Полуостров Бугарите се порезервирани – 3,7 отсто сметаат дека некои држави не треба да влезат во ЕУ, а 31 отсто сметаат дека сите треба. Бугарите имаат најмногу резерви за влез во ЕУ во однос на Турција, Албанија, БиХ и Косово.
Бугарите го одобруваат приемот на Македонија во ЕУ (58:18), но го условуваат со договорот за добрососедство (61%). Сепак 36 отсто од Бугарите сметаат дека Македонија води негативна политика кон нејзините соседи (36%), позитивна оценка за ова даваат само 10 %, а 41 % немаат став за ова.
Студени и умерено студени се македонско-бугарските односи за 30 отсто од Бугарите, многу топли и умерено топли за 17 отсто, а ни топли ниту студени 52,4 отсто.
Каков е вашиот однос кон граѓаните на Република Македонија и кон власта во Република Македонија? Кон граѓаните главно е позитивен – 61 %, а кон властите позитивен одговор дале само 13 % од анкетираните граѓани. Овие податоци не се никакво изненадување ако се знаат некои аспекти од внатрешната и надворешната политика на Република Македонија, сметаат од АФИС.
Во целост, вие лично колку близок или туѓ го чувствувате македонскиот народ, беше едно од прашањата. 14 отсто сметаат дека македонскиот народ е многу близок, за 30 отсто близок, 15% сметаат дека е малку и целосно туѓ, но најголем дел анкетирани немаат активен однос по тоа прашање.
Бугарскиот народ смета дека личните односи меѓу луѓето се главно позитивни, како и историското минато, економијата, културата, но не и науката, образованието, медиумите и заедничката одбрана и сигурност.
За две третини од бугарските граѓани недоразбирањата во однос на историските настани и факти се најсилно изразени во македонско-бугарските односи. Секој четврти Бугарин смета дека медиумите и немањето доволно контакти меѓу политичарите го предизвикуваат тоа. И на трето место се прашањата поврзани со нарушените права на малцинствата – речиси половината од анкетираните го посочиле и ова прашање како проблем во актуелните недоразбирања.
8,5 отсто од анкетираните одговориле дека имаат роднини меѓу бегалците од Македонија или се потомци на бегалци од денешната територија на Република Македонија.
Во бугарското јавно мислење (една третина) преовладува ставот дека населението во Македонија е со бугарско потекло. За втората третина од анкетираните граѓани на Бугарија нека никаква дилема дека Македонците се етнички Бугари. Само 6 отсто од анкетираните Бугари сметаат дека Македонците немаат никаква етничка врска со нив.
Истото го сметаат и за Пиринска Македонија – 61 отсто од анкетираните одговориле дека таму живеат Бугари. А само 4 отсто одговориле дека таму живеат Македонци. 12 отсто од анкетираните велат дека сите Македонци, каде и да живеат, се Бугари.
Во однос на тоа како Бугарија ја води политиката кон Македонија во заштитата на нивните национални интереси 21 отсто сметаат дека таа политика е добро избалансирана, 14 отсто сметаат дека се прават премногу отстапки, а 15 отсто сметаат дека Бугарија недоволно ги штити националните интереси во односите со Република Македонија.
|