|
ПРОСЛАВА НА СРПСКА ОКУПАЦИЈА ИЛИ...
Николиќ на Кајмакчалан и на средба со Иванов, реакции од македонски партии - кој ја прославува својата окупација?
Српскиот претседател Томислав Николиќ денеска во Битола ќе се сретне со претседателот на Македонија Ѓорге Иванов, а претходно ќе присуствува на комеморација на битката на Кајмакчалан од Првата светска војна. Српска делегација ќе оддаде почит на српските војници погребани на воените гробишта од Првата светска војна.
Николиќ денеска ќе биде придружуван и од владика на СПЦ и на местото каде во Првата светска војна пред 100 години загинале 4.600 српски воници ќе положат цвеќе на спомен костурницата на врвот Свети Илија. На планината Ниџе на македонско-грчката граница ќе пристигнат со хеликоптер, а потоа ќе оддадат почит и на воените гробишта во Битола. Цвеќе ќе положат и претседателот на Република Српска Милорад Додиќ и министерот за одбрана Зоран Ѓорѓевиќ, кои се дел од делегацијата на претседателот, како и амбасадори на државите сојузници од Првата светска војна во Македонија и претставници на Здружението на Србите во Македонија.
Двајцата претседатели, Иванов и Николиќ, по средбата во Битола ќе имаат заедничка прошетка во центарот на градот и средби со граѓани.
Српскиот претседател вчера беше во посета на Грција. Тој во Солун се сретна со претставници на локалната власти и ги посети сојузничките гробишта „Зејтинлик“ и Светогорскиот центар.
За време на Првата светска војна, пред точно 100 години на Кајмакчалан се воделе тешки борби меѓу бугарската армија, од една страна, и француската и српската војска, од друга страна, како дел од Македонскиот фронт, биле мобилизирани и голем број Македонци, но и од други краеви на земјата. Присуството на српската војска во овој дел од земјата беше во историјата се изучува како српска окупација на Македонија.
И српската принцеза Јелисавета Караѓорѓевиќ пред два дена допатува во неофицијална посета на Охрид и беше пречекана од претставници на општината. Не е познато дали и таа ќе присуствува на свеченоста на Кајмакчалан.
На овој пречек од страна на општината Охрид на српската принцеза реагираше ВМРО-НП. „Општината организира свечен дочек на обичен турист, претставувајќи ја како принцеза иако земјата од која потекнува не е кралство, туку република. Големото задоволство на претставниците на општината е на грбот на мекедонскиот народ за сите маки што ги претрпел од претците на таа т.н. принцеза. Знаат ли од општина Охрид чиј потомок вчера свечено пречекаа? Дали игнорирањето на годишнината на Охридското востание е добра волја во насока на денешниот пречек? Дали следен чекор од општината е можеби иницијатива за подигање споменик на крвникот на македонскиот народ Александар Караџорџевиќ? Посебно сме заинтересирани околу ставот на ВМРО – ДПМНЕ околу оваа церемонија“, велат од ВМРО-НП.
Денеска по повод овие свечености се јави и партијата ТМРО која упати јавно предупредување до македонската влада.
„Македонската Влада да не си игра со Македонците и да не дозволи влез на српски официјални претставници, од Република Србија, Република Српска во Босна и СПЦ, како и да забрани секакво денешно одбележување на прослава на Кајмакчалан со која се прославува српската окупација на Македонија во 1912. Не постои народ во светот, кој ја прославува својата окупација, но ако некој мисли дека е ослободување, тогаш е тоа веќе проблем со неговиот идентитет“, рече Ванчо Шехтански, претседател на ТМРО.
http://www.mkd.mk/makedonija/politika/nikolikj-na-kajmakchalan-i-na-sredba-so-ivanov-reakcii-od-makedonski-partii-koj
|
Николиќ на Кајмакчалан и на средба со Иванов
