Град Скопје денеска го почна проектот за изградба на градска плажа на кејот на реката Вардар, зад Луна паркот.

Со проектот, на површина од 1.775 метри квадратни ќе се постави урбана опрема од монтажен карактер, 20 маси, 80 столчиња и 80 лежалки. Плажата ќе биде со ситен песок, а се предвидуваат две куќички и простор за детски забавни содржини. Градската плажа ќе работи од 10 до 23 часот и граѓаните ќе можат бесплатно да ја користат. Посетителите на градската плажа ќе можат да ги користат тоалетите од Луна паркот.

Градоначалникот на Град Скопје Коце Трајановски рече дека со плажата сакаат да заживее кејот и да се вратат старите плажи на Вардар. Тој додаде дека вакви плажи има во повеќе европски градови и изрази надеж оти и на други локации ќе се градат плажи, од следната година.

Трајановски потенцира дека жителите на Скопје ќе можат и понатаму да ја користат ролерско-велосипедската патека на кејот на реката Вардар и оти се оставаат и три метри за трчање.

Тој информира дека наскоро ќе постават и табли на кои ќе пишува дека е забрането капењето во реката Вардар. - Ќе има тушеви, каде жителите ќе можаат да се освежуваат, рече Трајановски.

За изградбата на плажата ќе се потрошат околу 6,3 милиони денари, а изведувач е компанијата „Алкон“. Плажата треба да се заврши кон крајот на јуни, а ќе биде отворена до крајот на август.

Прашан за Центарот за управување и контрола на сообраќајот, Трајановски рече дека сакаат да го градат преку кредити.

- Во постапка сме на добивање на тој кредит. Во моментов тој е во Министерството за финансии. Мислам дека е одобрен и ќе почне преговарање со банките. Со оглед на големината на вредноста на проектот, ние не можеме од наши средства да го изградиме, рече Трајановски.

За ревитализацијата на езерото Треска, Трајановски одговори дека оваа година езерото нема да може да се користи за капење од оправдани причини, како стар проект, без ревизијам, бил делумен и со него не биле предвидени пречистителни станици,

- Веќе нарачуваме нов проект, кој е во фаза на дефинирање, рече градоначалникот на Скопје.


МИА

Съдържаниет е скрито
Влезте за да го видите