Митрова ќе добие уште 10 месеци затвор / Политика, Свят / Македония

ЗА НАВРЕДА НА СУДИИТЕ
Митрова ќе добие уште 10 месеци затвор?
На гевгеличанката со бугарски пасош Спаска Митрова, чијшто судски случај предизвика меѓудржавен политички проблем, и се закануваат уште десет месеци затвор или парична казна од 32.000 евра за навреда на двајца гевгелиски судии.
Одлуката ја донел судот во Гевгелија, откако во еден претрес Митрова ги нарекла двајцата судии „удбаши“. На оваа судска одлука Митрова се жалела, а Апелацискиот суд го вратил предметот на повторно одлучување во судот во Гевгелија. Предметот се уште не е завршен, а Митрова барала изоставување на Гевгелискиот суд поради пристрасност.
- Баравме овој суд да се изостави бидејќи тој не е надлежен зашто паричната казна го надминува износот од 12.000 евра. За надлежен требаше да биде прогласен судот во Велес, меѓутоа за надлежните ова воопшто не е важно - ни изјавија од семејството Митровски.
Според скопската телевизија „Алфа“, Спаска Митрова наскоро ќе го напушти затворот бидејќи правните советници на Иванов веќе почнале активности во соработка со Министерството за правда и Управата за извршување санкции, околу модалитетите врз основа на кои од хумани причини би и се дозволило на Митрова да излезе од „Идризово“. Овој развој на настаните го иницираше директната интервенција на бугарскиот претседател Георги Парванов, кој во телефонски разговор со претседателот Ѓорге Иванов побарал од него да го искористи својот авторитет и да и помогне на бугарската државјанка.
Според Лидија Гавриловска, директорка на Управата за извршување санкции, ослободувањето на затвореници од хумани причини е појава што многупати се применува во практика.
- Ваквото ослободување досега е применувано во многу случаи. Вакво ослободување најчесто добиваат затвореници што се болни, самохрани родители и слично. Меѓутоа, мораат да имаат одлежано една третина од изречената казна - истакна Гавриловска.