Остав за споменикот на бугарскиот полковник

Македонија не дозволува на своја територија Бугарија да го обновува споменикот на бугарскиот полковник Коста Каварналиев и на Фердинандовата чешма, се вели во писмото што деновиве било доставено до бугарските власти. Бугарската новинска агенција Фокус-њус вчера објави дека одбивањето се објаснува со „отсуството на реципроцитет“, односно, неможноста да се обноват македонски споменици во Бугарија.

Пред два месеца бугарскиот европратеник Евгениј Кирилов најави дека Бугарија ќе гради во Македонија два споменика, во согласност со договорот постигнат со македонскиот министер за надворешни работи Антонио Милошоски и со заменик-министерот за труд Спиро Ристовски. Кирилов беше во посета на нашава земја со цел да се запознае со состојбата во која се наоѓаат бугарските споменици во земјава. Најавата дека ќе се обновува споменикот на полковникот Каварналиев, кој загинал во 1913 година, предизвика реакции во македонската јавност. Воениот историчар Ванче Стојчев изјави дека е неприфатливо да се подигне поединечен споменик на висок офицер на друга земја кој се борел Македонија да влезе во состав на Бугарија.

- Ако сега дозволиме да му се подигне споменик на секој командант, ќе немаме право да ги спречуваме и Србите и Грците да им подигнат споменици на своите команданти на наша територија. Цивилизациски е да се одбележат гробиштата на загинати војници - изјави тој.Според него, бугарската страна треба да покаже подготвеност да се направи спомен-обележје за 12.000 Македонци што биле во составот на воената единица Македонско-тракиско ополчение. Многу Македонци од таа единица, мобилизирани од Бугарија, загинале во битката за Едрене против Турција.

"

Съдържаниет е скрито
Влезте за да го видите