|
|
|
|
|
Бугарските пасоши ја испразнија Виница
Во странство заминуваат и докажани квалитетни работници
Иван Бојаџиски
Штип - Виница се' уште се смета за економски најдобар град во источниот дел на Македонија. Дури 5.000 виничани својата егзистенција ја обезбедуваат работејќи во родниот град, а уште толку ги ставаат на располагање своите снага, работливост и стручност на странски работодавци.
„Порано во Виница младите бараа работа до која како-така стигнуваа. Денес фирмите бараат работници, ама нив речиси ги нема. Таа ситуација е посебно изразена во последните три години. Многу млади виничани ја искористија можноста да земат бугарски пасоши кои им ги отворија вратите за да заминат во странство. За виничката економија е посебен проблем тоа што во странство заминуваат и веќе докажано квалитетни работници кои ги напуштаат работните места во виничките фабрики. Нашите менаџери не се во можност да ги задржат. Финансиската ситуација во последниве две-три години е таква што тие не се во состојба да ги зголемуваат платите. Сите се свесни дека инфлација има, дека животот стана многу поскап од порано и дека таквите работници заслужуваат повисоки плати кои без проблем ги добиваат во странство“, вели виничкиот градоначалник Марјан Костадинов.
Првиот граѓанин на Виница е со став дека ако продолжи сегашниот тренд на финансиско исцрпување на претпријатијата, тогаш никој не ќе може да ги зголемува платите, адекватно да ги плаќа работниците и со тоа да ја обезбедува потребната работна сила и според квалитет и според квантитет. Двајца директори во реномирани винички претпријатија го потврдуваат ставот на градоначалникот Костадинов, но не сакаат нивните имиња да ги има во весниците плашејќи се од реперкусии.
„Оваа Влада две години го запоставува стопанството кое и' служи само за црпење пари со кои го полни буџетот. На таков начин претпријатијата не можат да делат повисоки плати. Нам, како на менаџери, криво ни е тоа што гледаме дека стандардот на работниците сериозно се подјадува, а како работодавци не сме моќни да ги зголемиме платите. Владата се грижи за подобар живот на администрацијата, на пензионерите, на оние што не придонесуваат за полнење на буџетот и кои не создаваат нови финансиски вредности. Таа го запоставува стопанството, од чија работа се полни буџетската каса. Стравуваме дека најголемиот дел од работниците ќе избегаат во странство само поради тоа што не сме во состојба адекватно да ги платиме. Зафаќањата од стопанството сега се поголеми од кога било и ако не бидат намалени, тогаш кај нас ќе снема работници. Особено што денес никој не го контролира механизмот преку кој младите, речиси без мака, земаат бугарски пасоши“, велат овие менаџери.
Градоначалникот Костадинов укажува дека виничките претпријатија се' уште редовно ги исплатуваат платите благодарение на своето добро работење. „Сепак, не' загрижува тоа што во последно време се зголемува бројот на стопанските субјекти кои доцнат со платите и до три месеци, нешто што никогаш не било виничка специфичност. Стравуваме дека ако овој тренд на зафаќања од стопанството остане, младите се' повеќе ќе ни бегаат, а нам се' повеќе ќе ни се зголемуваат проблемите со недостиг од млада, квалификувана работна сила“, вели Марјан Костадинов.
Статијата е прочитана 1893 пати.
Испрати коментар
^
| |
| |
| 
|
|
Бугарските пасоши ја испразнија Виница
