Грција уште во 1918 година ги признала Македонците

Британска издавачка куќа во 1918 година објавила етничка мапа на Балканот, истакнувајќи ја областа Македонија, чиј автор бил Јорго Сотеријадис, професор на универзитетот во Атина. Во неа Македонците се обележани како Македонски Словени, одделни од Бугарите, Грците, Албанците, Романците и од Махомеданците (Турците и Помаците).
Мапата била објавена како реакција на претходна мапа објавена од страна на британскиот весник „Дејли телеграф“ и се истакнува разликата на Македонците од Бугарите.
- Треба да се истакне дека во Македонија јазикот е до толку несоодветен критериум за одделување на народите, што дури и бугарските трудови ги обележуваат верниците на Грчката црква што зборуваат словенски како Гркомани или Гркосанти - пишува во текстот што ја проследува мапата.
Оваа мапа се однесува на етничката состојба во 1916 година, за време на Првата светска војна, пред масовното доселување на малоазиските Грци во Македонија. Во неа областа на Лерин и на Кукуш е прикажана како населена со Македонски Словени. Во посебен сегмент од мапата, посветен специјално на Македонија, авторот вели дека бројот на Грци во Македонија расте поради прогонот на Грци од ближната источна Тракија од страна на Бугарите и на Турците. Забележано е и дека во Солун, градот тогаш познат како Мајката на Израел, живеат 85.000 Евреи и уште 2.500 Евреи во другите големи градови на Македонија.
Сотеријадис прикажува турски области на Халкидики и во цела источна Тракија, како и во околината на Воден, Костур и на Кукуш, а албанска област спроти островот Крф. Мапата воопшто не претставува обид да се прикажат многубројните малцинства во Грција, туку напротив, со неа се прави обид да се докаже дека што поголем дел од Кралството е населен со Грци, како и да се прикаже значителното грчко население во западна Турција. Дури со размената на население меѓу Турција и Грција, по 1922 година, се сменила етничката слика на Македонија, поради што мапата на Сотеријадис денес изгледа како документ со кој се признава за грчки услови неочекувано висок степен на етничка разновидност во Македонија.