26.07.2008 19:24
Жозе Мануел Баросо


Европската комисија тврди дека нема ингеренции за малцинските права за нејзините земји членки. По една недела консултации со експерти по малцински права и меѓународни односи, претседателот на Комисијата Баросо одговори на писмото на премиерот Никола Груевски.

„ЕУ не е компетентна да решава за прашањето за македонското малцинство во Грција“, стои во писмото, чијашто содржина била доставена уште пред два дена до Владата во Атина.

„За Комисијата се многу важни почитувањата на човековите права и слободи, но ЕУ не е компетентна да го третира прашањето за идентитетот и правата на малцинствата, нивната националност и враќањето на нивната сопственост во земјите членки на Унијата“, пишува во писмото потпишано од претседателот Баросо.

Свесен дека Караманлис претходно негираше постоење на Македонци во Грција, која со расистички закони го блокираше враќањето на децата бегалци, Баросо ја посочува Атина како место каде треба да се реши проблемот со македонското малцинство и враќањето на имотите на егејските Македонци.

Според Комисијата, грчкиот Устав и обврските на Грција кон меѓународното право се шансата Македонците да ги остварат своите права. Тоа зависи од земјата членка која е засегната од спорот, и тоа во светлината на уставните и традициите на нејзините меѓународни обврски, вели претседателот на Европската комисија.

Повикувајќи на дијалог меѓу Грција и Македонија и наведувајќи ги добрососедските односи како услов за напредокот на Македонија кон членство во ЕУ, Баросо и директно најави дека без решение за името, Македонија нема да ги започне преговорите за членство во Европската унија.