Пет девојки, од кои една Бугарка и четири српски државјанки, завчера се фатени во ноќниот бар Ориентал Ас во тетовско Жеровјане


Четири Србинки и Бугарка, без регулиран престој во државава, се откриени од полицијата во ноќниот бар "Ориентал Ас" во село Жеровјане, соопштува тетовската полиција. Полицијата при рацијата две од девојките ги пронашла скриени во шахта во дворот додека бугарската државјанка била најдена во инпровизиран бункер во кујната од ноќниот бар. Полицијата, по документирање на случајот, ќе поднесе соодветна пријава против сопственикот на локалот Али Арифи. По добиени сознанија дека во локалот имало девојки кои илегално престојуваат и за кои се претпоставува дека се занимавале со проституција, со наредба на истражен судија, бил извршен претрес во локалот сопственост на Арифи. Покрај претресот во барот полицијата имала налог за претрес и во неговиот дом и помошните просториии.

Притоа, во собите од куќата биле затекнати Ж.В. (23) и А.С. (25) државјанки на Србија, додека нивните сонароднички М.П. (23) и Т.Д. (21) биле скриени во шахта во дворот. Во кујната, под скарата, во импровизиран бункер, полицијата ја открила бугарската државјанка Ж.Т. (31). Странските државјанки се уапсени и испрашувани во полициска станица. Истрагата треба да утврди дали петте девојки илегално влегле во државава по што тие ќе бидат префрлени во Транзитниот центар и депортирани во матичните земји.

Сопственикот на локалот каде се уапсени девојките и е добро познат на полицијата. Макрото Арифи многупати доаѓал во судир со законот. Минатата година Арифи беше осомничен и пријавуван за кршење на работнички права а МВР поради молчењето на приведените девојки не можеше да докаже дали девојките се жртви на трговија со луѓе и проституција. Поради нивниот молк, наместо да одговара за противправно лишување од слобода, газдата на Ориентал ас е гонет само за кршење на работнички права. Во рации на локали и ноќни барови во Тетовско и Гостиварско, даночната испекција многупати на сопствениците им изрекуваше парични казни и мерки за времена забрана за вршење на угостителска дејност. Статистиката покажува дека најголем профит во светот на криминалот носи трговијата со дрога, оружје и луѓе. Годишните статистики укажуваат дека илјадници мажи, жени и деца завршуваат како бело робје.

(К.Ѓ.)