16.07.2008 16:47
Костас Караманлис


И покрај сериозните економски предизвици со кои се соочува Караманлис, најголемиот дел од вчерашната седница на грчката Влада бил посветена на македонското прашање. Властите во Атина подготвуваат одговор на најновата македонска иницијатива за решавање на егејското прашање.

Сите министри во Владата биле едногласни дека треба жестоко да се одговори на провокациите на Скопје, по што кабинетот на Караманлис добил сугестии во писмото-одговор до премиерот Груевски, покрај редовните закани за вето во НАТО и ЕУ, да се потсети на грчкото ембарго за Македонија во деведесеттите.

Кабинетот на Караманлис расправал и за евентуалните последици по меѓународниот имиџ на Грција доколку радикалните сили предизвикаат насилство на прославата на празникот Илинден во леринско за време на викендот.

За барањето на Македонија, Грција да им го врати имотот и државјанствата на прогонетите Македонци, Караманлис ќе се жали кај генералниот секретар на ОН и до НАТО и ЕУ.

Во одговор на грчката Влада, која се уште тврди дека Грција е единствената хомогена етничка држава, без ниту едно национално малцинство, македонските власти за А1 велат дека Атина нема избор дали ќе ја прифати или одбие темата македонската заедница во Грција.

Според високи претставници на Владата во Скопје, Грција мора да ги почитува меѓународното право и конвенциите за човекови права, кои ги има потпишано. Тврдењето дека во Грција нема македонско малцинство е смешно во ситуација кога Европскиот суд за човекови права, Советот на Европа и други меѓународни институции, Македонците во Грција ги третираат не само како јазично, туку и како национално и етничко малцинство.

Во исто време со информациите дека грчки експерти во Атина ги анализираат резолуциите на Обединетите нации донесени за време и по Граѓанската војна во Грција, А1 дознава дека во соработка со турската Влада се интензивира истражувањето на турските државни архиви од страна на Македонија.

Неколку македонски истражувачи и историчари ќе добијат пристап до турските архиви во кои се наоѓаат огромен број документи поврзани со македонскиот народ, којшто живеел и живее во северна Грција.