Прванов шпион задолжен за Македонија
Процената на бугарските разузнавачи дека Георги Прванов е единствениот бугарски научник кој им се спротивставил на, како што се тврди, обидите на скопската историографија да ги фалсификува и изопачува фактите за „македонското прашање“ била една од причините за негово врбување во тајната служба во 1989-та година. Во досието кое вчера го отвори бугарската комисија за лустрација, актуелниот претседател на Бугарија е заведен под соработничкиот псевдоним „Гоце“. Оние што го врбувале за соработник, докторот по историски науки Прванов во обелоденетите документи го портретираат како личност која ги поседува неопходните лични и професионални квалитети за исполнување на задачи од културно - историското разузнавање. Прванов располага со широки можности за работа на „македонското прашање“, стои во оперативните документи на бугарските тајни служби. Неговите услуги биле користени се до август 1993-та, две години по падот на комунистичкиот режим. Прванов конкретно помагал во подготовката на книга за „македонското прашање“ чиј автор бил Македонец во Бугарија. Паралелно, требало да пишува и статии во „Македонска трибуна“ - весник на канадската пробугарски настроена „Македонска патриотическа организација“. По завршувањето на соработничката кариера во тајната служба каде бил задолжен за Македонија, Прванов три пати е избран за пратеник, а од 2001-та е шеф на државата. Како претседател десетина пати ја посетил Македонија.

Прванов се брани дека во досието „Гоце“ нема ништо повеќе од биографски податоци за него. Тврди дека не знаел дека неговиот ангажман, исклучиво како научен консултант во трудот на, како што го нарекува, бугарски емигрант – голем патриот кој страдал за националната кауза, бил спонзориран од разузнавачката служба. „Но и да знаев, исто ќе постапев“ - изјавува Прванов. Бугарската влада денеска застана зад претседателот.

Во Бугарија веќе се бара оставка од претседателот поради неговата активност во тајната служба. Тој треба да замине, зашто луѓето од државната безбедност како Прванов ја уништија демократијата во земјата, обвинија од парламентарната партија на демократи за силна Бугарија.