Реакции по предлогот за македонско-бугарска прослава на Илинден

Бучковски: Историчарите се пречка за Европа

Не може да одиме напред ако постојано од историчарите и од Бугарија и од Македонија не наоѓаме нишки што ќе овозможат отворање на европски перспективи, изјави вчера Бучковски

Премиерот Владо Бучковски вчера ги обвини македонските историчари дека се пречка за европските перспективи што ги отвораат политичарите со идејата за заедничко-македонско-бугарско чествување на Илинден. Тој обвини и за тоа дека неговите изјави биле извадени од контекст.

- Дел од историчарите не сака да го прифатат предизвикот што им го нудат политичарите. Сметам дека во минатото немало доволно добра клима и политичка волја за тоа. Да оставиме до следниот Илинден со добрата волја на политичарите, историчарите да излезат малку од рововите во кои се закопани. Инаку, не може да одиме напред ако постојано од историчарите и од Бугарија и од Македонија не наоѓаме нишки што ќе овозможат отворање на европски перспективи - изјави вчера Бучковски.

Идејата за заедничко чествување на Илинден и други празници на Македонија и Бугарија, која ја промовираа премиерите Владо Бучковски и Сергеј Станишев, најде на категорично отфрлање во јавноста. Историчарите од Институтот за национална историја завчера го осудија потегот на македонскиот премиер бидејќи со тоа ќе се бугаризира националниот празник на Македонците.

Бучковски вчера објасни дека првата идеја за заедничка прослава е од 1969 година, од поранешниот македонски раководител Крсте Црвенковски и Тодор Живков, тогашен претседател на Република Бугарија.

- Покојниот претседател Борис Трајковски ја обнови идејата во Сандански. Сега, идејата почна од Прванов, а Станишев ја пренесе. Реков дека годинава не планираме нешто слично - вели премиерот Бучковски.

Тој ги повика македонските историчари да излезат од „своите ровови“

- Нема добра волја, имам многу повредни приоритети отколку јас да го пробивам патот - рече тој.

Во јавноста не стивнуваат реакциите поради најавата на Бучковски и Станишев. Извршниот комисионер на НСДП и носител на листа во четвртата изборна единица Веле Митаноски, промовирајќи ја изборната програма на својата партија во Прилеп, го обвини премиерот Бучковски дека на своите неистомисленици пред изборите им лепи етикети на маргиналци и предавници.

- Нека дојде во Прилеп или нека појде во Ваташа и нека праша со кого и против кого борците од 1941 година испишуваа заедничка историја - додаде Митаноски. Според него, посетата на бугарскиот премиер Станишев е дел од предизборната кампања на СДСМ.

- Тоа што Бучковски го продаде Илинден и што легна на бугарското брашно за еден народ во две држави е цената што требаше да ја плати пред Станишев. СДСМ и неговите водачи на ист начин постапија во 2002 година молејќи посета од бугарските социјалисти како што во иста функција двапати беа во Софија. Тоа е само нивно предизборно „на ти го-дај ми го“ и ништо повеќе - рече Митаноски.

Лидерот на ДУИ Али Ахмети изјави дека нема сознанија за разговорите на Бучковски со Станишев.

- Но, мислам дека Македонија има свои празници и нив треба сама да ги чествува. Не ми е познато како дошло до ваков договор помеѓу Македонија и Бугарија - рече Ахмети.

Съдържаниет е скрито
Влезте за да го видите