|
|
| Тема |
 Илинден ке го честват със зурлаџии и тапанџии |
|
| Автор |
_krez (фалсификатор) |
|
| Публикувано | 27.07.05 15:15 |
|
|
|
ВО ЧЕСТ НА ИЛИНДЕН
Две групи коњаници утре тргнуваат за Крушево
Седум коњаници облечени во комитско ќе тргнат кон Крушево по патеката што води преку Сопиште и Македонски Брод. По истата патека првпат на 31 јули 1978 година тројца млади луѓе, самоорганизирани, на коњи, облечени во комитска носија, спроти големиот христијански и национален празник Илинден влегле во Крушево за да се поклонат пред споменикот на храбрите илинденци. Шеснаесет коњаници, пак, до илинденско Крушево ќе јаваат преку Велес и Прилеп. Обете групи коњаници ќе тргнат утре од пред црквата "Свети Петар и Павле" во скопско Горно Лисиче. Традиционалниот Илинденски марш по осми пат го организира здружението "Илинденски марш-1978 година" од Горно Лисиче.
Групата што ќе јава преку Македонски Брод ќе ја предводи комитата Борче Стефковски, а таа кон Прилеп ќе ја води Александар Ицковски.
Маршот ќе почне со дефиле на плоштадот Македонија во Скопје, во 17 часот, по што коњаниците со "Фалангата на Филип и Александар Македонски", 100-тина игроорци од КУД "Никола Јонков Вапцаров" од Горно Лисиче и КУД "Македонче" од Благоевград, Бугарија и дваесетина зурлаџии и тапанџии ќе минат по скопските улици.
Свеченостите ќе продолжат во дворот на црквата "Свети Петар и Павле" во Горно Лисиче. Таму ќе ги пречека поглаварот на Македонската православна црква, г.г Стефан, кој ќе ги благослови младите комити. Среќен пат на коњаниците ќе им посакаат и скопскиот градоначалник Трифун Костовски и градоначалниците на неколку скопски општини и на Крушево. Во црковниот двор ќе се одржи и голем народен собир со познатите пејачи Орце Стевковски, Благица Павловска, Марјан Стојановски, Сузана Турунџиева, која ќе ја испее македонската химна. Веселбата ќе продолжи со музиката на етно-групата "Синтезис". Се очекува коњаниците за Крушево да тргнат вечерта во 21 часот.
Коњаниците на 31 јули ќе пристигнат во Крушево, каде што ќе ги пречека Борче Карев - внук на првиот претседател на Крушевската Република, Никола Карев. Младите комити ќе се поклонат пред спомениците во Слива и на Мечкин Камен. (Д.Ј.)
| |
| |
| 
|
|
