|
ОРГАНИЗАЦИЈА ЗА ЗАШТИТА НА ПРАВАТА НА МАКЕДОНЦИТЕ ВО АЛБАНИЈА “ДРУШТВО ПРЕСПА"
МАКЕДОНЦИТЕ ИНТЕГРАТИВЕН ФАКТОР ВО АЛБАНИЈА
20 мај 2005 година, Пустец, Мала Преспа - На 14 мај 2005 година во село Пустец, Мала Преспа, се одржа Четвртата редовна изборна кофнеренција на Организацијата за заштита на правата на Македонците во Албанија “Друштво Преспа”. На Конференцијата од 98 присуствува 65 делегати од 13 секции на Организцијата од селата Глобочани, Горна Горица, Долна Горица, Зрновско, Леска, Пустец, Туминец, Церје и Шулин и градовите Подградец, Корча, Билишта и Тирана. Конференцијата усвои нов Статут на Организацијата, Извештај за работа и Финансиски извештај за периодот 2001-2005 година, како и Програма за работа за периодот 2005-2009 година.
Делегатите, на предлог на сите 13 секции на Организацијата, за претседател го избраа повторно досегашниот претседател Едмонд Темелко и за наредните четири години до 14 мај 2009 година.
На Конференцијата присуствуваа и присутните ги поздравија: Валентин Божиновски портпарол на кабинетот на претседателот на Република Македонија, Дарко Костадиновски помошник за надворешна политика во кабинетот на претседателот на Република Македонија, Ивон Величковски претставник на г-дин Стојан Андов претседател на Постојаната анкетна комисија за права и слободи при Собранието на Република Македонија, Стево Симски прв секретар на Амбасадата на Република Македонија во Тирана, Тодор Петров претседател на Светскиот Македонски Конгрес, Јован Андоновски генерален секретар на ВМРО-Народна партија, Кимет Фетаху претседател на друштвото МИР од Тиран, Јани Ѓамо претседател на Македонско-Егејското друштво МЕД од Врбник, Мехмет Хоџа претседател на Друштвото ГОРА од Кукс, Ефтим Митревски претседател на Заедницата на Македонците во Албанија, и Васил Стерјо, претседател на Студентското друштво на Македонците од соседните земји на Република Македонија.
Поздравни телеграми до Конференцијата упатија Титот Петковски претседател на Комисијата за одбрана и безбедност на Собранието на Македонија и академик Цветан Грозданов претседател на Македонската академија на науките и уметностите.
Конференцијата со јавното гласање едногласно за претседател на надзорната комисија на Организацијата ја избра Лефтерија Малевска, а за членови на надзорната комисија на Организацијата ги избра Михалаќ Постоличин и Нико Митре.
Конференцијата го прогласи составот на Управниот комитет на Организацијата кој брои 34 членови.
Конференцијата донесе повеќе резолуции: за статусот на македонските православни цркви во Албанија, за изградба на Македонската православна црква “Свети Архангел Михаил” во село Пустец, за името на Македонија, за името на Македонската православна црква, за учеството на престојните парламентарни избори во Албанија, за Љубе Бошковски и Јохан Тарчуловски, и за унапредување на положбата и правата на Македонците во Албанија.
Конференцијата донесе одлука за учество на престојните парламетнарни избори во Република Албанија, а за кандидат за пратеник во изборната зона 84 во областа Мала Преспа го утврди Ѓорѓи Тане од Корча, дипломиран правник, оженет, татко на две прекрасни ќерки, поранешен претседател на Студентското друштво на Македонците од Албанија кои студираат во Република Македонија.
Конференцијата утврди иницијатива за склучување билатерална спогодба за положбата и правата на Македонците во Албанија и Албанците во Македонија врз основа на рамноправност и реципроцитет.
Конференцијата, исто така, имајќи предвид дека македонските православни цркви во Република Албанија отсекогаш биле под јурисдикција на древната Охридска Архиепископија/Патријаршија, побара православните Македонци во Албанија на референдум да решат под јурисдикцијата на чија православна помесна црква да бидат. Конференцијата го осуди насилното брутално и со силна полициска придружба т.н. “осветување” на МПЦ “Свети Архангел Михаил” во село Пустец во 2003 година од страна на корчанскиот владика Јован.
По седницата на Конференцијата се одржа првата конститутивна седница на Управниот комитет кој брои 34 члена. На предлог на членовите, Управниот комитет избра двајца потпретседатели на Организацијата Таќо Гроздани и Олси Дума, за генерален секретар на Организацијата го избра Јани Андони, а за благајник на Организацијата го избра Пали Колефски.
Управниот комитет донесе одлука за формирање 13 секции на Организацијата, одлука за определување на бројот на членовите на одборите на секциите на Организацијата, одлука за определување на бројот на членовите на Управниот комитет од секциите на Организацијата и одлука за прогласување на составот на Управниот комитет по изборот на двајцата потпретседатели, генералниот секретар и благајникот на Организацијата.
20.05.2005
|
“ДРУШТВО ПРЕСПА"
