apsolutno isti!

СКАНДАЛОЗЕН ИЗБОР ЗА ЕВРОСОНГ
Мартин Вучиќ ќе не претставува во Киев
Тој освои најмногу гласа од жирито и од публиката во салата, а според телевоутингот најмногу гласа освои нумерата "Сонце и месечина" на Александра Пилева

Мартин Вучиќ со песната "Ти си сон" е победник на националниот евровизиски избор што се одржа завчеравечер во Универзалната сала во Скопје и ќе не претставува на "Евросонгот" во Киев, Украина. Тој победи со гласовите од жирито и публиката во салата. Најмногу гласови според, телевоутингот освои Александра Пилева со песната "Сонце и месечина". Огромната разлика во гласовите од телевоутингот и гласањето на жирито и гледачите предизвика голем револт во салата и различни шпекулации дека изборот е наместен.

- Им благодарам на сите што гласаа за мене. Му благодарам и на "Мобимак". ѓ честитам и на Александра Пилева која е една од најдобрите вокали во Македонија. Ви благодарам на довербата и ќе се потрудам во Киев да ја претставувам достојно Македонија - изјави Мартин по победата.

Шестото издание на македонскиот "Избор на Песна за Евровизија" понуди тричасовна програма, во која Пилева и Мартин ги изведоа своите четири нумери. Победникот се избираше во два круга. Во првиот круг гласање беа одбрани темите на двајцата изведувачи кои освоија најмногу гласови од трите гласачки сегменти, "Ти си сон", односно "Сонце и месечина". При повторното гласање на публиката во сала, жирито и телевоутингот победи песната "Ти си сон" на Мартин.

Ова евровизиско издание во почетокот изгледаше како забавна манифестација, на која посебен шмек и даваа навивачките групи на Пилева и Мартин кои во рацете држеа знаменциња со нивниот лик и платнени пароли на кои беа испишани нивните имиња.Освежување беше и настапот на Биба Додева, Адријана Јаневска, Искра Трпева, Тамара Тодевска и малата Мартина Силјановска претставничка на детскиот Евросонг. По завршувањето на првиот круг на гласање атмосферата во салата стана пеколна. Се слушаа свирежи, вриштења, особено при гласањето на жирито. Водителките Анета Андонова и Каролина Петковска безуспешно се обидуваа да ја смират публиката во салата.Нервоза се чувствуваше и во холот на салата. Фановите на Александра велеа дека победата е наместена зашто е "купено" жирито и публиката во сала.

- Од авион се гледа дека целава работа е наместена. Гласањето по телефон по првиот круг покажа безмалку трипати поголемо водство на Пилева - револтирано изјави посетителка на настанот.

Оние, пак, што навиваа за Мартин тврдеа дека е "наместено" гласањето преку телевоутинг.

- Се обидував да гласам неколку пати за песната на Мартин. Вртев речиси десет пати, но линијата беше зафатена. Така беше и при првото гласање, тврдеше фан на Мартин.

Раздвиженоста на менаџерските тимови на двата изведувачи беше голема. Дознаваме дека Калиопи јавно го искажала својот револт од гласањето на жирито и влегла во дуел со Драган Вучиќ кој и се обратил со зборовите: "Доста веќе делиш совети".

Дарко Димитров изиритиран се упатил кон местото каде што седела директорката на МТВ Гордана Стошиќ и премиерот Владо Бучковски. Имал вербален дуел и со Иван Мирчевски. Разочараните фанови на Александра не го поштедија жирито кое го гаѓаа со јајца и предмети и им упатуваа погрдни зборови. Некои членови од жирито изјавија дека едвај спасиле глава. На вчерашната прес-конференција Дарко Димитров, Иво Јанковски Драган Вучик и Иван Мирчески нагласија дека по конструктивниот разговор и долгото размислување официјалниот став ќе го објават во вторник. Дотогаш ќе се разгледуваат приговорите што ги поднеле двете страни до МТВ. Беше посочено дека ако се откријат неправилности при изборот, МТВ ќе преземе ригорозни мерки.