|
© Вечер
2/19/2005 Бр. 12821 ИЗЛЕГУВА СЕКОЈ ДЕН ОСВЕН НЕДЕЛА
ЕДНА ПРЕПИСКА, ШТО ПОКАЖУВА ДЕКА ДРУГИТЕ СЕ ПОВЕЌЕ ЈА СФАЌААТ БЕСМИСЛЕНОСТА НА СПОРОТ ОКОЛУ ИМЕТО
Интернет-тепачка за Македонија
Прво излезе текст на сајтот за тоа "Што е Македонија", напишан од Томас Кис, кому со свој текст му одговара Александар Астринакис, Грк, кој е на докторски студии на Кембриџ.
Од прикажаното ќе може да се види дека некогаш и доктор по науки, поради национализмот, ја губи смислата за реалност, па историјата за Македонија ја претставува на начин што е повеќе од чуден
На интернет-страницата "Usless knowledge" неодамна Македонија беше тема на препукувања. Што е Македонија, каква земја е, што значи таа држава и слично.
Прво, на 3 февруари излезе текст на сајтот за тоа "Што е Македонија", напишан од Томас Кис, кому со свој текст му одговара Александар Астринакис, Грк, кој е на докторски студии на Кембриџ.
Од прикажаното ќе може да се види дека некогаш и доктор по науки, поради национализмот, ја губи смислата за реалност, па историјата за Македонија ја претставува на начин што е повеќе од чуден.
Тој повикува на знаење, а самиот е полн со незнаење. Посебно кога станува збор за историјата. Оваа преписка покажува дека се повеќе во светот другите, за разлика од Грците, сфаќаат колку е беспредметна расправата што Атина ја води околу името Македонија.
Што напиша едниот, а што другиот? Што е Македонија? Од Томас Кис, автор на неколку книги 3 февруари 2005 Што е Македонија? Во 1991, со распаѓањето на Југославија, се појавија пет нови држави, во геополитичка смисла: Словенија, Хрватска, Србија и Црна Гора, Босна и Херцеговина и Македонија. Македонија, или целосно, Република Македонија, е земја со население од 2 милиона жители и површина од 9.600 квадратни милји, колку што е голема американската сојузна држава Вермонт, а главниот град се вика Скопје.
Таа е земја без излез на море, заокружена од Грција, Србија и Црна Гора, Бугарија и Албанија.
Премиер е Владо Бучковски, а претседател Бранко Црвенковски. Две третини од населението се Македонци, а другата третина ја сочинуваат неколку етнички групи, пред се Албанците.
Македонската православна црква е формирана во 1945 година како духовен наследник на бугарскиот патријарх во Охрид, кој беше укинат од Отоманското Царство во 1767 г. Македонскиот јазик е дел од јужната група словенски јазици, која е една подгрупа од индо-европското семејство.
Бугарите го сметале македонскиот како дијалект на бугарскиот јазик.
Република Македонија некогаш се нарекува БЈРМ, акроним од Поранешна југословенска република Македонија. Државите кои ја признаа Македонија, вклучувајќи ги САД, Кина и Русија, ја нарекуваат земјата Македонија, а Грција и некои други земји ја нарекуваат БЈРМ.
Македонија е име на поголем географски регион, 26 илјади квадратни милји, кој ја вклучува не само Република Македонија, туку и трите дела, политички подделови, еден во Грција, наречен Западна, потоа Централна и Источна Македонија, делот во Бугарија.
Грција тврди дека името Македонија се однесува само на делот кој е во Грција, и во раните 90-ти години воведе ембарго против Република Македонија за користење на името.
Ова беше прашање, што го поттикна падот на поранешниот грчки премиер Константинос Мицотакис во рацете на тврдокорниот Андреас Папандреу. Македонците тврдеа дека Грците ја добиле контролата на тој дел по Втората балканска војна во 1913 година и дека македонското население, кое останало да живее во тој регион, има заеднички елемент. Грците забранија да се користи македонскиот јазик и бараа послушност за Грчката православна црква.
Има неколку тешкотии вклучени во македонското прашање. Едно е Александар Велики.
Во секоја исторска книга, што ќе ја пронајдете, пишува за големиот освојувач дека е Александар Македонски. Прашањето дали античките Македонци биле Грци. Грчкото гледиште е дека Македонците се само една подгрупа на Грците, или Хелените, како Атињаните и Спартанците.
Па, тие периодот на Александар го нарекуваат хелинистички период, наместо македонски период, како што е неговата слава и гордост. Современото македонско гледиште е дека античките Македонци им се културни и етнички предци и дека тие се разликуваат од Грците.
Тие додаваат дека Грците, откако добиле независност од Турците во 1830 година, почнале самите да создаваат митови за нивната поврзаност со хеленистичката Грција, кога имаа неуспешен обид да го заживеат покласичниот тип на Грци, кој ја тераше земјата кон артефактите и пишувањата да бидат дел од нивната пропаганда.
Во друг напис "Дали Грците се Грци?", јас прашувам дали грчкиот етнички контиуитет може да биде возможен со оглед на инвазијата на Грција во текот на вековите. Грците тврдат дека податокот дека современиот македонски јазик е јазик од словенската група јазици, покажува дека Словените дошле многу векови по Александар, па современите Македонци не може да бидат наследници на античките Македонци.
Ова го покренува прашањето, како може некој да докаже дека, на пример, јазикот на Александар бил еден вид матрица од каде подоцна се развиле словенските јазици. Античките писатели може само да го претпостават постоењето на одделен македонски јазик во времето на Александар, но тоа не е доволно да се докаже дали е варијанта на грчкиот или е сосема друг јазик, за кој Македонците велат дека е еден вид прото-словенски јазик.
Се разбира, во оваа област има нејасни делови. Ако Грција целосно ја признае Македонија, тоа значи дека тоа ќе ја легитимизира и сопственоста на наследството на Александар, за кој Грците мислат дека имаат право да биде нивен.
Очигледно, вистинскиот корен на проблемот кај Грците е што признавањето на името Македонија е исто како да се признае дека Македонците се нација која има свои права.
Ова ќе значи дека Македонците, во и надвор од Грција, имаат право да се обединат во нивната земја - татковина, која ќе значи голема Македонија каде ќе треба да се вклучи и дел од Грција. Значи, се стравува за интегритетот на Грција. На почетокот на 2005 година грчко-македонската дебата се уште трае, посебно по признавањето на уставното име на Македонија од САД пред три месеци.
Лично јас сум за обединета Европа, па се што звучи како сепаратизам, отцепување за мене е анатема. Второ, Александар многумина го сметаат како херој, како Цезар, Наполеон, или Кан, но колку сироти будали сакаат да го дадат својот живот за да станат еден Александар?
Знаењето е клуч за Македонија Од Александар Анронаракис, кој во моментов се наоѓа во Кембриџ каде ги привршува своите докторски студии 4 февруари 2005 Драга публико и Томас Кис, македонското прашање е географско позиционирање и историска измама, па јас ќе бидам кус во моето излагање. Создавањето на државата Скопје.
Оваа област на Балканот секогаш била сметана за родно место на модерната бугарска нација, како што е Косово на Србите.
Охрид беше главен град на Бугарското Царство во 10 век.
За време на Отоманското Царство оваа област била нарекувана Румелиски милеет и немаше ништо заедничко со Македонија.
Јас зборував со Бугарин и еден образован скопјанец и тие обајцата се согласија дека зборуваат ист јазик и дека се од иста раса како и Бугарите.
Идејата за словенски браќа, кои се нарекуваат Македонци, е само производ на фантазијата на Тито. Всушност, Југославија беше единствената земја на чии граѓани им требаа визи за Грција.
Какви тешкотии имале тие од Грците, а не страдале од бугарскиот фашизам за време на Втората светска војна?
Не им дозволивме влегување на Словените во Грција, бидејќи тие се комунисти! А не поради нивниот етникум!
Ние само што завршивме со граѓанската војна и го поразивме комунизмот кога Тито ја прогласи републиката. Географската позиција на Македонија. Е, ова е за изненадување!
За време на Византија, темата Македонија не значеше современа област.
Главниот град беше Адријанопол и се протегал од Сераи до ѕидовите на Константинопол. Објектот Македонија беше нарекуван Солун.
Исто така, македонската династија на Византија дојде близу Адријанопол, и беше полуерменска.
Никој не може да спори дека античката Македонија беше во најголем дел во современата грчка Македонија, а северот беше периферија. Историја. Еве неколку прашања.
Зошто Филип се обиде да го едуцира неговиот син кај грчки филозофи? Зошто Александар создаде хеленска империја и ја вклучи хеленската лига. Тој можеше лесно да направи империја на неговиот дијалект. Токму тоа е тоа- дијалект.
И за време на кампањата беше кажано дека Македонците го користат дијалектот за пријателите. И Кипраните, ако не сакаат да бидат разбрани од Грците, можат да кажат дека не се, но, всушност, и тие се Грци! Дали Александар бил Грк? Тој се чувствувал како Грк. А Словените? Тие не се појавија до 6 век од север.
Тие немаат и немаа ништо со Македонија. До времето кога дошле овде, Македонците беа елиминари од Римјаните, па тие станаа целосно Грци. Како што рече Томас Кис, ние треба да се стремиме кон единство и да го наречеме Скопје како Македонија.
Но, тоа е груба навреда на нашата и бугарската почва. И оставете ги античките народи да почиваат во мир. На Славомакедонците ќе им предложам, ако сакаат, ново име да им биде Охриѓани или западна Бугарија. И, ве молам, научете ја историјата. Како што рекол Сократ: "Знаењето е единственото добро, а незнаењето е ѓаволот".
ТАТЈАНА ЦВЕТКОВСКА
© Вечер
|
Интернет-тепачка за Македонија
