|
Македонските Словени се ист народ со античките Македонци
Иван Блажевски
Македонија ја доби најстарата историска читанка некогаш напишана за Македонците и за нивната земја. Нејзин автор е Ѓорѓија Пулевски, Мијак од Галичник, кој во 1893 година во Софија ја издал книгата, која „за да ја разберат сите полуостровски Славјани“ ја напишал на славјанско-македонско наречје. Станува збор за многу значајна книга што се чувала во бугарските архиви.
„Историјата“ летово ја објави МАНУ, а таа содржи досега необјавени информации за населувањето на Словените и за потеклото на Македонците.
Ова значајно дело за македонскиот народ стотина години беше во историските архиви во Софија, а историчарите велат дека да била објавена по Втората светска војна, „Историјата“ на Пулевски сосема ќе го променела познатиот пристап за потеклото и за историјата на македонските Словени, како и теоријата за нивното доаѓање од зад Карпатите. Според Пулевски, таа теорија не е точна.
- Најголем дел од неговите сознанија и ставови не е многу далеку од тие во историската наука што функционирала во неговото време. Пулевски бил човек што повеќе сакал отколку што можел, зашто имал скромно самообразование, но остави дела со особена историска важност - наведува академикот Блаже Ристовски, кој заедно со проф. д-р Билјана Ристовска-Јосифовска, го подготви изданието на ова дело.
Пулевски тврди дека македонските Словени се староседелци на Балканот и оти векови подоцна дошле Бугарите, а потоа и Србите. Тој е еден од ретките творци во 19 век што најдиректно се изјасниле како Македонец. Според него, македонските Словени се ист народ со античките Македонци.
„За Македонци оту имале свои цареви и царствено управленије познаваме уште од Тројанскиот бој“, пишува тој во почетокот на „Историјата“.
Книгата денеска е отпечатена на оригиналниот јазик што го користел галичанецот, а содржи неколку дела: Славјанско-македонска историја од Потопот до 900 година пред Христа, од 900 година до 148 година пред Христа, од 148 година до 395 година во нашата ера, од 395 година до 1360 година и последната етапа до крајот на 19 век.
Тој наведува дека сите Словени во старо време живееле во Азија, а уште во антиката, македонските Словени се населиле на Балканот, а другите заминале преку Кафказ, зад Карпатите (во Сармација), од каде што и тие во 6 век по Христа се спуштиле кон Балканот.
Според Пулевски, Македонците, односно, како што кратко ги нарекува, Мијаците, се народот на Александар Велики.
Старото македонско население, пишува тој, било составено од три поголеми народи, односно нареченија. Првото наречение биле Теменидите, второто Пеонидите, а трето биле Арнаутите.
„Време“ во следните броеви ќе пренесе неколку значајни дела од обемното дело на Пулевски, за кое историчарите и книжевниците велат дека во блиска иднина ќе иницира коренити промени во изучувањето на историјата на Македонија и на македонскиот народ, со што би можеле да се променат општоприфатените историски четива на Балканот.
Последните години од животот Пулевски ги поминал осамен. Починал осиромашен во Софија, а до денеска не му се знае гробот.
(Утре: За Славјаните и за доаѓањето на Македонците на Балканот)
|
Македонските Словени се ист народ со античките Мак
