|
ФРАНС ФУДБАЛ" ГО НАПРАВИ СВОЈОТ ИЗБОР
Недвед најфудбалер во Европа
Играчот на Јувентус по пауза од 41 година стана вториот Чех, почестен со наградата на француското списание за најдобар фудбалер во Европа
Јозеф Мазопуст повеќе не е единствениот чешки фудбалер со "Златната топка" на "Франс фудбал", што се доделува за најдобриот играч во Европа. Плејмејкерот на Јувентус, Павел Недвед, ја доби својата компензација за неиграњето во финалниот натпревар од ЛШ поради два жолти картони, нешто што го чинеше неговиот тим неуспех на "Олд трафорд" во дуелот со нивниот голем ривал, Милан. Чехот воедно е и прв играч со признанието на "Франс фудбал" од Источна Европа по Бугаринот Христо Стоичков во 1994 година.
- "Златната топка" воопшто не ме интересира. Играчите мора да повеќе да размислуваат за хуманитарни работи, отколку за индивидуални награди. Сепак, среќен сум што наградата ми е доделена мене, што значи дека луѓето ја ценат мојата долгогодишна напорна работа на тренинзите и мојата желба на теренот. Но, би сакал да повторам, во животот има многу поважни работи, отколку награди, титули и победи, беше првичната реакција на Недвед.
Чехот се наврати и на најтрагичниот момент во неговата кариера:
- Сеуште имам непроспиени ноќи поради пропуштањето на финалето. Знаете, кога бев помлад имаше многу други играчи, кои беа далеку подобри од мене, па јас морав да работам навистина напорно за да ги подобрам моите вештини, за на крајот да го пропуштам натпреварот, кој требаше да претставува врв на мојата кариера.
Напаѓачот на Арсенал, Тјери Анри, повторно остана со куси ракави, но и овојпат тоа го прими со достоинство:
- Не победив овојпат, но сеуште имам менталитет на победник. Има уште многу работа за да го постигнам идеалниот однос на голови и шанси.
За разлика од него, тренерот на Милан, Карло Анчелоти, како и во случајот со Зидан не е задоволен со изборот:
- Зидан и Недвед не освоија ништо во Европа минатата сезона, така што повторно ќе морам да проверам дали го имаме пехарот од Лигата на шампионите во нашите витрини.
Оваа награда секако ќе му помогне на Недвед да го надмине комплексот - заменик на Зидан, кој го следи уште од доаѓањето во редовите на Јувентус.
- Тоа ми пречеше уште кога пристигнав во Торино, но отсекогаш знаев дека ќе играм важна улога во тимот. Зидан е неверојатен фудбалер. Се што прави изгледа толку природно, нозете ги користи со иста вештина како ние рацете, објасни скромниот Чех.
Во гласањето на францускиот неделник учествуваа новинари од сите 52 европски земји.
***
Лична карта:
Павел Недвед е роден на 30 август 1972 во Кеб, Чешка, во работничко семејство. Стапи во брак на 21 година со Ивана, со која има две деца. Синот се вика Павел Помладиот, а ќерката Ивана Помладата. Професионалната кариерата ја започна во 1991 година во Дукла, оттаму премина во Спарта, за по успехот на ЕП 1996 година, да премине во Лацио. Таму со успех настапуваше се до 2001 година, кога за сума од 25 милиони фунти направи трансфер во Јувентус.
Последни десет победници:
2002 - Роналдо (Бразил)
2001 - Мајкл Овен (Англија)
2000 - Луис Фиго (Португалија)
1999 - Ривалдо (Бразил)
1998 - Зинедин Зидан (Франција)
1997 - Роналдо (Бразил)
1996 - Матијас Замер (Германија)
1995 - Жорж Веа (Либерија)
1994 - Христо Стоичков (Бугарија)
1993 - Роберто Баџо (Италија)
***
Најдобар и во Чешка
Павел Недвед, е прогласен за најдобар чешки спортист за 2003 година во изборот на спортските новинари. Недвед беше клучен играч во освојувањето на титулата на "старата дама" во Италија, како и во пласманот на неговата репрезентација на Европското првенството во Португалија. Зад Недвед, на листата се најдоа нордиецот Мартин Коукал и хокеарот Милан Хејдук.
|
Недвед најфудбалер во Европа