|
МАКЕДОНСКОТО ИСЕЛЕНИШТВО СЕ КРЕНА НА НОЗЕ
"По грешка" избришани од Законот за државјанство?!
Пропустот е ненамерен, изјави претставник на МВР
Македонците од целиот свет се кренаа на нозе од страв, како што велат, Владата со предложените измени во Законот за државјанство да не ја пресече нивната врска со матичната земја. Во Светскиот македонски конгрес (СМК) ги потврдуваат бурните реакции за владиниот обид за исфрлање на македонското иселеништво од Законот за државјанство, кои деновиве пристигнаа од ОМО-Илинден, од Заедницата на Македонците во Холандија, од трите македонски заедници во Германија, од Заедницата на македонските друштва во Швајцарија, од Македонската заедница во Њу Џерси, од Советот на македонските заедници во Нов Јужен Велс.
- Македонците од целиот свет и порачуваат на Владата дека треба да го повлече срамното решение бидејќи стравуваат оти со тоа засекогаш би можела да се пресече врската со Македонија, единствената нивна матична држава - изјави Тодор Петров, претседателот на СМК.
Претставниците на Владата и на експертската група што го подготвиле законот имаат различни објаснувања за предложеното решение, со кое на Македонците по потекло што не се родени во Македонија, а живеат надвор од нејзините граници им се одзема правото на државјанство. Тоа право, пак, им се дава на сите граѓани што се родени во Република Македонија, без разлика каде живеат. Тоа, на пример, значи дека Македонците што живеат во егејскиот или во пиринскиот дел на Македонија, во Албанија или во некоја од републиките од СФРЈ, како и сите каде било во светот, заедно со нивните потомци, не ќе можат да добијат македонско државјанство. Тоа право, пак, според предложените законски измени го добиваат Албанците, Турците, Србите, Ромите и припадниците на други етнички заедници, доколку докажат дека се родени на територијата на Република Македонија.
- Тоа не е наше решение. Во формулацијата што ние ја предложивме беа задржани и Македонците по потекло што живеат надвор од границите на Македонија. Но, не би влегувал во мотивите поради кои Владата подоцна го преформулира тој член. Ниту едно од спорните решенија во Законот не е наше - изјави Борче Давитковски, претседател на работната група за измени во Законот за државјанство.
Ерол Салих, помошник-министер за управно-надзорни работи во МВР, вели:
- Сметавме дека треба да се оди со нова формулација што ќе ги опфати сите граѓани што живеат надвор од Република Македонија, а потекнуваат од нејзината територија и дека со тоа нема да има пречки за Македонците по потекло. Во тоа Владата немаше никакви скриени намери. Станува збор за, да речеме, ненамерен пропуст и верувам дека тоа ќе биде поправено - изјави Салих.
Диана Младеновска
|
МАКЕДОНСКОТО ИСЕЛЕНИШТВО СЕ КРЕНА НА НОЗЕ
