АРХЕОЛОШКИ ИСТРАЖУВАЊА
Теракоти најдени на "Тумба Маџари"
Француско-македонски научници го истражуваа археолошкиот локалитет "Тумба" од среден неолит, во скопската населба Маџари, каде што луѓето живееле од 5800-та до 5300-та година пред нашата ера
Фрагменти од жртвеник од Големата Мајка, грниња, делови од фина и груба керамика, теракоти се пронајдени на археолошкиот локалитет "Тумба" од среден неолит, во скопската населба Маџари, каде што луѓето живееле од 5.800-та до 5.300-та година пред нашата ера. Таму, минатиот месец археолошки истражувања вршеше македонско-француски тим. Проектот комплетно го финансираше Националниот центар за научни истражувања од Париз, со 25.000 евра, под раководство на археолозите Кетрин Команж од француската страна и на Драгиша Здравковски од Музејот на Македонија.
Истражувањата минале во најдобар ред, но имало и спротивставени мислења - нашите научници сметаат дека Каталановското Езеро и Арачиновското блато егзистирале во времато на населбата "Тумба Маџари", додека француските научници велат дека тие биле средновековни.
- Ги доистражувавме сондите што ги отворивме на ланските истражувања. Отворивме и нови за да лоцираме цел архитектонски објект. За жал, за еден месец работа не стигнавме се да истражиме - вели археологот Здравковски.
Екипата работела на објектот, каде што лани откриле плитка када, длабока дваесетина сантиметри, околу која пронашле кристали од сол.
- Пронајдовме делови од жртвеник, посветен на Големата Мајка. Фрагментите се од пределот околу градите. Да го отворевеме целиот објект ќе најдевме повеќе делови од жртвеникот. Сепак, има материјал за реконструкција. Од доцниот неолит пронајдовме минијатурна женска глава од фигурина. Слој од доцниот неолит е многу разорен и тешко се "фаќа". Поконкретни заклучоци од ископувањата засега не може да се извлечат. Неолитот е специфичен период на кој треба да се работи долго време, за да се сумираат резултатите. Генерално, ланските и годинашните истражувања се продолжување на научните сознанија од 1981 година и подоцна, кога Тумба Маџари го ископуваше археологот Воислав Санев - вели Здравковски.
Од керамиката, пронајдена е груба, работена во техниките барботин (налепување глина на садот), импресум (врежување линии и убоди) со различна орнаментика. Од фината керамика пронајдени се фрагменти, обоени со темнокафена боја.
Француските експерти правеле и поленова анализа на предметите (анализа на поленовиот прав, налепен на артефактите), за да добијат податоци за седиментациите и климатските промени во неолиотот, во овој дел од светот. Стручњаците направиле неколку геолошки сонди во околината на Тумба Маџари. Сите анализи на земените примероци ќе се вршат во Франција. Според Здравковски, локалитетот се уште крие многу тајни:
- Не знаеме каде им се некрополите - од што умирале луѓето, како ги погребувале, со што се хранеле. Се уште сме на почетокот.
Во истражувањата на Тумба Маџари учествуваа геологот Ерик Фуше, Селин Касот, седиментолог, археолозите Селин Денво и Гоце Коцевски и студенти по археологија од земјава и од Франција.
|