|
Тема |
"Јас го разбирам светот единствено како поле за ку |
|
Автор | Piksi (Нерегистриран) | |
Публикувано | 08.05.03 20:39 |
|
|
Во предвечерјето на Илинденското востание, пред сто години на 4 мај во селото Баница, Серско, Егејска Македонија, во борба со османлиската војска загина Гоце Делчев, еден од најголемите идеолози на ослободителното движење на македонскиот народ од преминот на 19-тиот во 20 век.
Делчев бил роден на 4 февруари (23 јануари, стар стил) 1872 година во Кукуш, Егејска Македонија, во семејството на Султана и Никола Делчеви. Гимназиско образование стекнал во Солун. Бил питомец во военото училиште во Софија, а подоцна исклучен поради социјалистичките идеи. Оттогаш учителствувал во Македонија и пристапил во Револуционерната организација.
Поаѓајќи од конкретната состојба - недоволната револуционерна подготвеност на масите, слабото вооружување, неповолната внатрешна и надворешна ситуација, бил еден од противниците на решението од конгресот во Солун, 1903 година, за кревање востание. Сметал дека моментот не е погоден. Делчев не бил против востание, туку за негова добра подготовка и затоа, согледувајќи ја штетноста од предвремени востанички акции, тој се обидел, безуспешно, да влијае за изменување на одлуката за подигање востание.
На пат кон планината Алиботуш, каде што во почетокот на мај 1903 година било планирано да се одржи конгрес на Серскиот округ, на чело со Јане Сандански, за да се разгледа решението за кревање востание, Гоце Делчев бил смртно погоден во борба со турскиот аскер.
Во историјата на македонското националноослободително и револуционерно движење, Делчев зазема врвно место и е симбол на стремежите на поробените народни маси за слобода. Така, дури и во странскиот печат од тоа време, за него се употребувале епитетите душа на македонската револуција, идол и апостол на македонските селани, балкански Гарибалди...
Освен учител и војвода, Делчев бил и визионер со широки разбирања за вистинските односи меѓу народите. Оттаму и неговата позната максима: "Јас го разбирам светот единствено како поле за културно натпреварување меѓу народите".
|
| |
|
|
|