|
|
| Тема |
 100-годишнината на македонската државност |
|
| Автор | Утpинckи вecниk (Нерегистриран) | |
| Публикувано | 25.01.03 11:30 |
|
|
|
Собранието по бурна дискусија ја усвои одлуката за одбележување на 100-годишнината од македонската државност
Албанците сакаат да се видат на прославата на Илинден во Крушево
Невена Поповска
На вчерашната собраниска седница бројни дискусии и бурни реакции од пратениците на албанските партии предизвика 17-тата точка од дневниот ред посветена на Предлог- одлуката за одбележување на 100-годишнината на македонската државност 1903-2003 година. 
Зиди Џелили, член на Комисијата за култура, забележа дека во доставената Предлог-одлука се застапени само половината од значајните настани и личности за кои било дискутирано на седниците на Комисијата. На тоа се надоврза пратеникот Јордан Михајловски, кој појасни дека во Комисијата за култура воопшто нема дилеми во поглед заокружувањето на програмата. Проблем е факторот време и затоа овој предлог е нецелосен.
За Стојан Андов и Ганка Самоилова-Цветановска одбележувањето на 100-годишнината на Илинденското востание е најважен настан годинава и во тоа одбележување треба да се вклучат сите институции и сите пратеници треба да ја поддржат одлуката. Талат Џафери смета дека ваквите образложенија не држат, бидејќи носител на македонската државност не е само македонскиот народ, туку и другите заедници во Македонија, во конституирањето на Крушевската Република учествувал и албанскиот етникум. Според Киро Дојчиновски, одбележувањето мора да се одвива врз основа на одлука и затоа сите треба да гласаат за предлогот.
Кенан Хасипи забележа дека одбележувањето на денот на солунските атентати, за припадниците на турскиот етникум е неприфатливо од причина што атентатот како терористички чин во денешно време е неприфатлив. На тоа реплицираше претседателот на парламентот, Никола Поповски, кој појасни дека солунските атентатори ги извршиле своите акции во време на окупација на Македонија и тие биле чин на револт и отворена борба за слобода. Тоа во никој случај не смее а се изедначува со атентати во мирнодопски услови.
Абдулади Весели се заложи за донесување интегрална програма за одбележување годишнини на значајни личности и настани во 2003 година од страна на Комисијата за култура и притоа праша дали предлагачите се историчари и дали Комисијата за култура се консултирала со некои научни институции при предлагањето на оваа одлука? Претседателот на парламентот, Никола Поповски, рече дека предлагачите на програмата за одбележување се навистина историчари, а во програмата, кога таа ќе биде заокружена, ќе бидат застапени настани и личности од сите заедници во Република Македонија.
"Штотуку направивме еден светски чекор, а веднаш потоа направивме два-три балкански, рече Слободан Чашуле, подвлекувајќи дека треба да бидеме достојни следбеници на нашите предци, а не да ги бараме корените на сегашните делби таму каде што не постојат, т.е. во минатото".
За Хисни Шаќири проблемот е во тоа што не постои координација на работите. Одбележувањето на овие настани и личности треба да биде заедничко, бидејќи, според него, во Илинденското востание, Крушевската Република и АСНОМ учествувале и Албанците, а сега тие се дистанцираат. Шаќири се заложи и меѓу предлагачите на одлуката да има и еден Албанец.
По дадената пауза, за збор се јави пратеникот Исмет Рамадани, кој рече: ?Многу малку Албанци учествуваат во одбележувањето на 2 Август. Сакаме годинава да се видиме како дел од македонската историја, да се видиме во Крушево. Од друга страна, постојат настани кои треба да се одбележат, а претставуваат познати историски датуми, кои датираат од минатото кога државните граници биле поинакви. Барањето за одбележување на овие настани не претставува чин и намера за непризнавање на државните граници на Република Македонија, а оние кои не посакуваат Албанците да бидат дел од државотворниот континуитет на Република Македонија погрешно го сфаќаат и ги поставуваат нештата".
Пратеникот Зиди Џелили својата забелешка ја упати до институциите кои доставувале предлози до Комисијата за култура, а во кои не се содржани предлози за одбележување на значајни настани и личности од албанската историја. На крајот со 61 глас "за" беше усвоена Предлог- одлуката за одбележување на 100-годишнината на македонската државност 1903-2003 година.
| |
| |
| 
|
|
