|
|
| Тема |
 Делото на Конески ќе го негува фондацијата Небрегo |
|
| Автор | ! (Нерегистриран) | |
| Публикувано | 10.05.02 21:31 |
|
|
|
Делото на Конески ќе го негува фондацијата „Небрегово“
10.05.2002 Фондацијата за македонски јазик „Небрегово“ ќе ги негува традициите поврзани со делото на големиот македонски книжевник и научник Блаже Конески и ќе го поттикнува проучувањето на неговото творештво од областа на јазикот, македонската литература и култура.
Во советот на фондацијата се вклучени видни македонски научници, книжевници, политичари и бизнисмени, меѓу кои и Петре М. Андреевски, Атанас Вангелов, Венко Андоновски, Димитар Бајалџиев, Борче Давидковски, Лазар Китановски и други.
Претседател на управниот одбор на фондацијата „Небрегово“ е академик Георги Старделов, а основач е Љупчо Палевски, кој пред две години ја купи родната куќа на Конески во Небрегово, сега сопственост на фондацијата со идеја да се претвори во спомен дом.
Фондацијата планира богата активност, а засега го преиздаде текстот на Блаже Конески „По повод најновиот напад на нашиот јазик“, кој бил за прв пат објавен во 1948-та година и не е вклучен во објавуваните дела на Конески.
„Текстот е одговор на тогашите бугарски оспорувања на македонскиот јазик, значаен документ, но и актуелен текст поврзан со многу појави што ни се случуваат и сега“, рече професор Вангелов, според кој во некои медиуми, денес, Конески е забранета тема.
„Неговото дело е најдобар одговор на сите оспорувања“, вели Трајко Стаматовски.
Следен проект на фондацијата „Небрегово“ е издавањето на зборник трудови на 40-тина домашни и странски слависти кои се однесуваат на дејноста на Блаже Конески.
| |
| |
| 
|
|
