|
Izvinjavam se ako veche ste cheli tazi statja. 
Додека Македонија со сите сили се обидува да излезе од вителот на можната војна, кога за прв пат во овие десетина години меѓу македонските граѓани почнува да се кристализира она што значи национален, витален интерес, од канцеларијата на Љупчо Георгиевски, партиско-маркетиншки, а би требало да изгледа "патриотски" ни порачуваат: "премиерот не го поддржува повлекувањето на тешкото оружје од позициите кои ги држат македонските безбедносни сили". Божем се работи за беспрекорна вистина, која произлегува од загриженоста за "македонските национални итереси што ја пројавува", за нас Георгиевски, ја "потврдува" и неговиот воен хушкач и лажен патриот, портпаролот, Антонио Милошоски. Зборуваат, Георгиевски и неговите с* и сешто во време кога треба да отпочне целосната имплементација на мирот: бараат виновници, откриваат такви, "плукаат" по оние кои се за мир, како сите да треба да бидеме на нивната страна, да предизвикаме војна која сигурно, во сегашниот миг ќе биде трагична за Македонија, но многу исплатлива за македонските соседи, а особено за Бугарија. Следејќи ја таа нивна воинствена реторика и изопачена логика, во која со предавства создадоа вештачка клима дека македонските безбедносни сили (и армијата и полицијата) се неподготвени да го бранат територијалниот интегритет и суверенитет на државата, на крајот си направија своја лична партиска паравојска и параполиција, која ја стационираа во тетовските села: Ратае, Жилче и Јегуновце!
Црвени беретки и црни кошули
Изворите на СТАРТ говорат, дека оваа параполиција наречена "Лавови", за која дпмнеовските медиуми велат дека е некаква си официјална формација при МВР, всушност, треба да ја разгори меѓунационалната омраза, според сценариото на бугарскиот разузнавач, Бриго Аспарухов. Наши извори во владата тврдат дека, всушност, за т.н. "лавови" не постои владина одлука (не е ни расправано на седница на владата) или доколку таа (одлуката) постои, тогаш донесена е интерно - што, пак, е класичен фалсификат - од дпмнеовскиот дел од владата. Се работи за првокласен скандал, поради кој, како што дознаваме, деновиве за малку што не предизвикал бунт на регуларните полициски сили на Македонија. Буквално се работи за приватна - партиска војска за која се трошат државни пари (а веројатно и средства чие потекло и сопственост се непознати). Никој од останатите партнери во широката влада нема поим колку "лавови" воопшто има под оружје, со што с* се наоружани, која им е намената, кој командува... Нивниот амблем, практично е, идентичен со партискиот "лав" на ДПМНЕ - симболика (заедно со црвената беретка) видена за време на предизборието 1998 година, а и пред тоа, кога исти такви "беретки" ги обезбедуваа митинзите на партијата. Или, како и пред неколку недели во Прилеп и Битола, иако таму меѓу народот се познати како извесна агенција за обезбедување наречена "Тодор Александров"!? Практично, "лавовите" сега доаѓаат како "браќа" по оружје на оние Џаферови и Тачиеви "црни кошули", (параполициска) формација за обезбедување на партиските митинзи на ПДПА-НДП, кои се промовираа со провокативните поворки низ Гостивар во 1997 година. Непосредно пред настаните со знамињата, но се појавија и како обезбедување на митингот на тогашниот градоначалник Руфи Османи. Не треба да се сомневаме дека тие (или некои од нив) сега се "борци за човекови права" во т.н. ОНА.
"Лавовите" наводно, ги предводат Јохан Тарчуловски, некогашен шеф на обезбедувањето на Борис Трајковски, потоа бившиот полицаец, мајор Пеце Христовски од Битола, инаку 1992/93 година осуден на две и пол години затвор поради директно учество во шверц со автомобили. Заедно со нив е и Горан Димитриевски, актуелен началник на одделот за специјални намени при МВР, некогашен командир на Петтата полициска станица - Гази Баба. Патем за оваа полициска станица се говори дека била главен регрутен центар на параполицијата, која е под директна команда на премиерот Љупчо и неговиот министер Љубе. Во командниот кадар се спомнуваат и извесен Сашо-Булдог од Битола, но и некој си Маче од Прилеп, инаку и двајцата членови на ДПМНЕ и предводници на хулиганите од Битола и Прилеп, кога беа кршени и палени продавниците на македонските муслимани, а ја запалија и прилепската џамија. Инаку, оваа параполиција, е создадена преку обединувањето на т.н. "Млади лавови", кои пишуваат графити со закани по скопските ѕидови и прилепско-битолскиот "патриотски фронт", кој беше под директна контрола на битолскиот Бугарин, Димитар Црномаров. Интересно е дека во овој приучен состав, се собрани членови на ДПМНЕ од повеќе градови од Македонија, кои досега се истакнале со лојалност кон Љупчо и кон бугарската кауза.
Вистинското лице на "Лавовите"
Податоците на СТАРТ говорат дека во овие три тетовски села, речиси на самата "линија на разграничување" со "терористите" од т.н. ОНА, сместени се 260 припадници на параполицијата, кои како што и самите тоа им го објаснувале на тетовци, примаат "команди и наредби" единствено од хрватскиот слаткар Љубе Бошковски и "галеничето" на Доста Димовска, Љупчо Георгиевски. Најтрагичното, како што ни објаснуваат жителите на овие три села, е тоа што "лавовите" се сместиле по приватни куќи и од прозорците на нивните куќи пукаат во воздух. Поднапиени, поттикнати од фактот дека тие се оние во кои Љупчо и Љубе "единствено имаат доверба", заборавајќи дека се само најобични марионети на една, во основа антимакедонска опција, без притоа да размислуваат дека ги откриваат своите позиции. Прашање е кога, слично на Лешок, Доброште и Теарце, македонските домови во Ратае, Жилче и Јегуновце, ќе бидат гранатирани, па повторно да започнеме да зборуваме "за етничко чистење на Македонците", за, според зборовите на Бошковски, "некои типчиња кои сметаат дека овој конфликт може да се реши по мирен пат", или за "непријателски расположените западни земји кон Македонија", за кои Љупчо Георгиевски во март минатата година официјално кажа: "За состојбите во Македонија", повеќе никој од Македонија нема да биде меродавен да зборува - "тоа ќе го прават претставниците од ЕУ и НАТО каде што тежнееме да станеме полноправни членки".
Минатиот петок, околу 21 часот и 30 минути, педесетина вооружени хулигани на Георгиевски и Бошковски, влетале во селската чајџилница во Шемшево и од газдата побарале да бидат услужени со жестоки пијалаци. Бидејќи повеќето од параполицајците од составот на "Лавовите" биле струмичани и штипјани, му се заканувале на сопственикот, секако незнаејќи дека во чајџилница не се точи алкохол, со оружје ставено на чело, мислејќи дека Албанците не сакаат да ги услужат. Инцидентот за среќа поминал без последици, откако еден тетовец од составот на параполицијата, им објаснил што и како се служи во чајџилниците во западниот дел на Македонија. Раскажуваат Албанците од Шемшево дека педесетте параполицајци, лумпувале и пукале низ Шемшево, до 24 часот. Некои од жителите, јатаци на терористите кои селото само три дена пред тоа го напуштиле, сакале да побараат помош од насилниците, но постарите Албанци, не им дозволиле.
Вакви и слични инциденти со елементи на насилство и манифестирана омраза кон с* што е албанско (или муслиманско), забележани се во изминативе десетина денови и во самиот град Тетово. Постојат Албанци, кои и покрај с* одржуваат врски со Македонците тетовци. Некои од тие Албанци влегувале во, условно речено, македонските кафулиња. Откога "лавовите", параполицајци, го запоседнале градот, во македонско кафуле Албанец не смее да стапне, не затоа што не сакаат, туку поради тоа што "насилниците на Љупчо и Љубе" им се закануваат. Од нивното доаѓање во Тетово, од пред дваесетина денови, во реонот од триста метри околу кафеаните "Бина" и "Бакшиш", Албанец не смее да помине.
Обезличување на македонскиот народ
А, во основа, Љубе Бошковски со неговите соработници од ПДПА-НДП (поточно неговиот заменик Рефет Елмази), со силна поддршка на некои македонски информативни електронски и печатени медиуми, успеа да го обезличи и македонскиот народ, па дури и да го претстави како "недржавотворен", со единствена цел, а тоа е веќе очигледно, да ја промовира параполицијата на ДПМНЕ. Затоа, тој делеше оружје, по список, на Македонците од тетовско и гостиварско. Потоа, списоците "мистериозно" се појавија во "штабовите" на терористите. Тие (терористите), по два дена, доаѓаа, како, на пример, во гостиварското село Пожаране, и бараа оружјето што го добиле да го предадат, за потоа, она што Бошковски го поделил, да го искористат против примателите на подарокот. Овие, без да го употребат, го предаваа. "Итриот" слаткар, потоа објаснува дека списоците до терористите пристигнале преку Албанците, кои работат во МВР за да н* убедува дека генерално на сите Албанци "не смее да им се верува". Трагедијата на таквите "усвитени глави" е во тоа што не можат да разберат дека Македонија е мала земја, во која за неполн час с* се дознава.
И, додека Бошковски ни се претставува за "македонски спасител", сигурно, улогата му ја доделил неговиот шеф бугароманот Георгиевски, заборава дека оружјето на македонското население го делеше не само пред месното население, туку и пред терористите. Ги шетал камионите со оружје, делел јавно "калашникови" од украинско производство, а за одбраната доделувал само по четири рамки за муниција, со вкупно 50 куршуми... Запукале селаните од тетовските села Лешок, Теарце, Доброште... кон терористите, па убиле: во Лешок еден припадник на т.н. ОНА, во Теарце пет и кога побарале дотур на муниција, командирот на полициска станица Тетово, член на партијата на Џафери, близок соработник на Љубе Бошковски, Дејан Готиќ, буквално ќе им рече: "Бидејќи сте Македонци, требаше да знаете дека последниот куршум треба да го сочувате за себе"!?
Факт е дека многу оружје, буквално "на црно" е разделено и меѓу албанските качаци на Тачи, но и меѓу "патриотите" на Бошковски. Прашање е што ќе се случи со сите тие партиски "патриоти" и воени авантуристи кога НАТО ќе ја заврши својата мисија овде, и кога т.н. ОНА ќе се растури. СТАРТ веќе напиша дека низ Скопје с* почесто се споменуваат разни списоци за нечии ликвидации - листи за отстрел! Слична ситуација е и меѓу албанската популација во Тетово и Гостивар. И таму постојат списоци на "неподобни" Албанци и листи на луѓе што треба да се казнат и елиминираат. Дали како последна шанса браќата по оружје Тачи и Љубе ќе ја "бранат" Македонија од нејзините граѓани!?
С. Шароски
|
"Start" pak strelja po Ljubcho i Bylgarija
