Во отсуство на окривениот, не е убаво да расправаме што бил по националност во време на дејствијата со кои го извршил делото. Да е Македонија голема, како што не е, ќе ги собере коските од “Свети Спас” и ќе ги врати во Софија. Во камен пакет на кој ќе биде изгравирано: Земните останки на Гоце Делчев, Бугаринот кој се враќа од привремена работа во Скопје, блгодарна Македонија. Гардиската бригада ќе биде построена на пистата на Аеродромот “Скопје”. Поздрав со истрели од пушки манлихери и химната која ќе го потсети починатиот дека по втор пат станува од гробот. Специјалниот авион на Владата ќе полета со звуците на Моцартовиот Реквием. И на некоја православна елегија во слава на Бога. Директен телевизиски пренос вршат Си Ен Ен, Ал Џезира, Би Би Си и МРТВ. Тридневна жалост во Скопје. Утврдување на кандидати за празниот гроб во скопската црква.