Зоран Тодоровски тврди: "СДСМ и ЛДП ја продолжуваат политиката на комунистичкиот режим кон МПО" Д иректорот на Архивот на Македонија, Зоран Тодоровски вчера изјави за „Дневник” дека реагирањата на СДСМ и на ЛДП околу неговите ставови за МПО претставуваат продолжување на политката на поранешниот комунистички режим. - Тој режим се мешаше во историската наука и влијаеше врз нејзините оценки и ставови . Во овие демократски времиња подобро е да се занимаваат со политиката на својата партија во интерес на македонската држава и на македонскиот народ, а не да ги повторуваат грешките на поранешниот комунистички режим во однос на историската наука - рече Тодоровски. Изјавите на Тодоровски дека Македонската патриотска организација е македонска организација, која се борела за слободата и самостојноста на Македонија, претставникот на СДСМ ја оцени како „неточна и во стилот на бугарската струја во ВМРО-ДПМНЕ”. За ЛДП местото и контекстот на изложбата за МПО во Крушево не биле соодветно избрани. Академик Блаже Ристовски изјави дека МПО отсекогаш имала пробугарска ориентација. - Архивската документација на МПО дава релна основа и постарите историчари да ги коригираат своите ставови и оценки во врска со оваа македонска организација и да не опстојуваат на нивните исполитизирани сознанија - вели Тодоровски. Според него, фактот што членови на оваа организација во извесен период биле на антимакедонска национална основа значи дека, сепак, треба нешто и да им простиме и да се приближиме со нив бидејќи тие се наши претци, наши роднини, соседи, соселани и сограѓани и наши денешни пријатели. (Б.Ѓ.)