човек не може да е / Политика, Свят / Македония

Песнарки и касети со македонски песни преработени во бугарски. делени за велигденските празници во Охрид. - Власта на Љупчо Георгиевски не мрдна ни со прст да ја попречи дрската пропагандна провокација Една песнарка со македонски народни песни и една касета што содржи дел од тие песни во тираж од околу илјада примероци, група младинци од ВМРО-БНД на Красимир Каракачанов ја делеа во Охрид за време на велигденските празници. Насловени со "Лирски македонски песни", а како дел од едицијата "Сите Б'лгари заедно", песнарката и касетата биле издадени минатата година во Софија од извесен Никола Григоров. Тој бил, како што дознаваме и еден од главните организатори на масовниот "аџилак" на туристи на "б'лгарскиот Ерусалим", како што големобугарската пропаганда го нарекува Охрид, лулката на б'лгарската култура". Песнарката во вид на брошура е типичен великобугарски памфлет, насочен кон негирање на сй што е македонско. Со неа по кој знае кој пат јасно се прави обид за бескруполозно присвојување на македонската историја, јазик, култура, обичаи и традиција, се негира амосвеста на македонскиот народ и тој се прикажува како бугарски. Во воведот, Григоров пишува дека песнарката ја посветува на својот татко, но и на "милата татковина Бугарија, која во борбата за своето постоење ги изгубило најубавите земји и милионите чеда што биле подложени на насилна асимилација и кои морале да емигрираат за да опстојат". Во продолжение уште вели: "нека знае историјата дека сме горди што сме Бугари и да ги запееме нашите најубави песни". Предговорот напишан од жестокиот антимакедонист - софискиот историчар Божидар Димитров, како недосонуван сон за санстефанска Бугарија, ги присвојува сите историски датуми и настани на Македонија, за да заклучи дека ќе останат само песните, за "героите" на бугарската национална епопеја во Македонија, откинатото парче од телото на "мајка Б'лгарија". И песните што се избрани се преправани секаде каде што се споменуваат Македонците, или Бугарите кои токму во тие песни се опеани како душмани на македонскиот народ. Од "Кажи Рајне", "Илчовице млада невесто", "Јовано, Јованке", потоа "Отвори ми, бело Ленче", "Павле ми пие", "Што ми е мило, ем драго", до песните на Јонче Христовски "Ај засвирете ми чалгии" и на пратеникот од ВМРО-ДПМНЕ Војо Стојановски "Каде и да одиш". Се разбира, неодминливи за опејување се и најголемите "герои" од поновата бугарска историја - Тодор Александров, Ванчо Михајлов и Мара Бунева. На крајот од брошурата се поместени неколку кратки текстови за најзначајните настани и "герои" од "историјата на Бугарија" (читај: санстефанска Бугарија) од крајот на 19 и од 20 век, напишани веројатно повторно од историчарот Божидар Димитров, во кои во еден кош се ставени и Гоце Делчев и Тодор Александров и Ванчо Михајлов и Мара Бунева. Кој е Никола Григоров? Авторот на оваа груба кражба и дрска велигденска провокација, никола Григоров, според информациите со кои располага СТАРТ, по потекло е етнички Македонец, на возраст од околу 50 години, роден во Пиринска Македонија во градот Гоце Делчев (Неврокоп). Сега живее во Пловдив, каде што е прв човек на "Тракија" - огромен пазар за трговија на големо и мало со сй и сешто. Човек тесно врзан со раководството на ВМРО-БНД на Красимир Каракачанов, еден од нејзините видни членови и најверојатен кандидат за пратеник на следните избори во Бугарија од листата на оваа врховистичка, антимакедонска партија. Во периодот 1990-95 година, значи цели пет години, Григоров живеел во Скопје. Не е познато дали бил претставник на некое бугарско претпријатие, или, пак, престојувал во некоја друга мисија. Не би било ни најмалку чудно, доколку тој бил овде по нечиј налог, едноставно да го провери "пулсот" на народот дали идејата за "освестување и враќање кон бугарските корени" на овдешното население може да добие на масовност. Или, пак, ги собирал песните за едицијата "Сите Б'лгари заедно". Затоа што, според некои информации, ќе бидат издадени барем десетина касети со вакви преработени македонски песни, а оваа што Григоров ја делел во Охрид е само втора по ред. Ваквата песнарка и касета се уште еден доказ повеќе дека Бугарите се непоправливо "романтични", во однос на Македонија. Тоа е истиот "романтизам" кој ги инспирираше бугарските окупаторски војски неколку пати во минатиот век да ја прегазуваат македонската земја и да го ограбуваат македонскотот културно богатство. Додека великобугарските националисти, без никакви проблеми ја шират својата пропаганда среде бел ден во Македонија, дотогаш Македонците од Пиринска Македонија не можат да читаат ни весници и списанија на македонски јазик, им се забрануваат политички партии, не им се дозволува слободно да се определат онака како што се чувствуваат. А, на новинарите од Македонија им се забранува да прават интервјуа, да снимаат или да фотографираат секаде во Бугарија каде што се манифестира македонизмот. Актуелната власт на ВМРО-ДПМНЕ, не мрдна ни со прст да го спречи Григоров и неговите истомисленици да го однародуваат Македонецот во неговата сопствената земја. Зоран Фиданоски