3000 евро глоба за неправилен македонски език / Политика, Свят / Македония

Почитувани македонисти,

XLI летна школа на Меѓународниот семинар за македонски јазик, литература и култура ќе се одржи во Охрид од 11 до 28 август 2008 година. За учесниците на летната школа подготвивме богата и разновидна програма. Основата на програмата ја сочинуваат лекторските вежби, предавања од областа на јазикот, литературата и културата, како и низа изборни курсеви од различни области. Културната програма нуди запознавање со културното богатство на Македонија, а посебно на културниот бисер - Охрид. Ќе бидат организирани средби со истакнати уметници кои ќе го претстават своето творештво. Сето ова е обмислено за учесниците на летната школа да ги продлабочат своите знаења од областа на македонскиот јазик, литература и култура.
Меѓународниот семинар за македонски јазик, литература и култура во своето четириесет годишно постоење има изнедрено бројни македонисти. Учесници на оваа школа биле над 3000 слушатели, од 45 земји. Сите што поминале низ оваа школа, а тоа биле студенти, научни работници, професори, преведувачи и други, станале вистински пријатели на Македонија кои ги пренесуваат своите впечатоци во своите татковини. Организацијата на оваа летна школа се темели врз долгогодишно искуство. Тука ќе имате можност да работите со најдобрите лектори по македонски јазик, да слушате предавачи специјалисти за своите области коишто доаѓаат од врвните научни и културни институции, како и да се запознаете со творештвото на најистакнати уметници од Македонија.
Во рамките на летната школа два дена ќе се одржува Научната конференција од областа на јазикот и литературата што е добра можност да се слушнат излагањата на истакнати македонисти од земјата и од странство.
Се радуваме што оваа година повторно ќе имаме средби со македонистите од најразлични краишта и што нивното присуство во Охрид и нас ќе не збогати со нови пријатели. Ве повикуваме во Охрид на летната школа да дојдете и да не запознаете подобро. До средбата во Охрид примете срдечен поздрав.

Научна конференција

Во рамките на Меѓународниот семинар секоја година се организира Научна конференција на којашто странските и македонските македонисти, слависти и балканисти ги соопштуваат своите истражувања од областа на јазикот и литературата. Оваа година темите на XXXV научна конференција се:

• лингвистичка секција:
1. Македонскиот глагол во словенски и во балкански контекст
2. Конгруенцијата во македонскиот јазик и
3. Спојност на текстот

• литературната секција:
1. Кочо Рацин како поет и публицист
2. Македонската книжевност наспрема другите светски книжевности

На двете секции се поканети по триесетина специјалисти од земјата и од странство што се истакнале со трудови од овие области.
Научната конференција ќе се одржува на 25 и 26 август.