Re: Само потсетување или конкретно предупредување / Политика, Свят / Македония

БЕЗ НАЈАВА ДО МАКЕДОНСКИТЕ ВЛАСТИ

Бугари ќе маршираат по македонските планини

Македонската влада од бугарските власти нема добиено официјално барање за организиран марш по повод 90 години од завршувањето на Првата светска војна, со кој би се обележале границите на тогашната бугарска држава. Од Владата велат дека никој од нив не побарал дозвола за престој на група од Бугарија во Македонија. Деновиве во бугарските медиуми се појавија информации дека Бугарија, заедно со амбасадата во Скопје, конзулатот во Битола и „Хоризонти“ - друштвото за соработка меѓу Македонија и Бугарија - ќе организира марш низ македонските планини Кајмакчалан, Беласица, Ниџе и Галичица. Тие места се посочени поради битки во кои учествувала бугарската војска и загинале голем број бугарски војници. Бугарија за време на Првата светска војна била на страната на Централните сили, кои се бореле против силите на Антантата во која биле Франција, Британија и САД. На Бугарија и било ветено дека ако учествува на страната на Централните сили ќе добие ревизија на Букурешкиот договор и можност да и припадне целата територија на Македонија.

Групата планирала посета на сите места во Македонија и оддавање почит на оние што загинале за Бугарија на сите поранешни бугарски територии.

Она што е најсимптоматично во целата најава е дека групата ќе носи со себе лесно оружје и ќе парадира со развиорени бугарски знамиња.

Маршот е предвиден да почне на 10 јули од Билјанините извори во Охрид затоа што, според нив, овој град го сметаат за еден од центрите на бугарската историја. Целата маршрута е планирано да заврши на 18 јули на планината Кајмакчалан.

На маршот ќе учествуваат и генералниот конзул на Бугарија Наум Кајчев и членови на друштвото „Хоризонти“, а најавено е и присуство на многубројна делегација од Бугарија.

Од Амбасадата на Бугарија го потврдија одржувањето на настанот, но не сакаа да коментираат никакви детали за тоа дали навистина групата што ќе ја посети Македонија ќе биде вооружена и дали за ова добиле дозвола од македонските власти. И во Министерството за надворешни работи на Бугарија велат дека знаат дека ќе се организира ваков собир, но додаваат дека ова е под директна организација на нивната амбасада во Скопје. Ова не е првпат од страна на источниот сосед да доаѓаат вакви провокации.

Неодамна во Велес беше подигната биста на Тодор Александров, која подоцна сопственикот на земјиштето каде што беше поставена беше принуден да ја отстрани.

Минатиот месец во бугарското собрание беше промовирана книга во издание на бугарската ВМРО, во која беше потенциран бугарскиот карактер на македонската држава и во неа се бараше Бугарија да го преиспита својот однос со Македонија.