“Другарю Тито, кълнем ти се” / Политика, Свят / Македония

Владата не ја поддржува претставата „Јосип Броз - Тито“

Министерот Илиријан Беќири, иако во Хамбург ветил дека ќе застане зад претставата, го повлекол зборот

БИТОЛА - Претставата „Јосип Броз -Тито“ по се' изгледа ќе биде еден од најголемите културни скандали во државата. Министерството за култура иако ветило поддршка, се повлекува. Претставата, која според авторите, не се занимава со реставрација на комунизмот туку е ироничен и забавен приказ на ликот и делото на Тито, ја разбранува јавноста. Мега проектот финансиран од Европската унија со 150.000 евра, кој се работи во осум европски театри, требаше да ја добие поддршката и од македонската Влада со 30.000 евра, меѓутоа, министерот Илиријан Беќири, иако во театарот Кампнагел во Хамбург, кој е носител на проектот, ветил дека ќе застане зад македонската претстава, сепак откако се вратил дома го повлекол зборот.

„Тито нема поддршка од македонската Влада. Министерот во последните две недели се крие и не одговара на моите јавувања. На крај зборував со некој од неговиот кабинет кој не сакаше да се претстави, но рече дека Владата нема пари за поддршка на овој проект“, вели уметничкиот директор на Кампнагел, Гордана Внук. Хрватскиот режисер Бранко Брезовец е фрапиран од опструкциите со кои се соочува при работата на овој проект. „Не сакам да кажам дека Македонија има врска со сталинизмот, но никогаш во последните 25 години не сум имал полоши услови за работа како овие во последните 25 дена во Македонија со оваа ситуација. Не случајно ја одбрав државата за реализација на претставата, бидејќи сметам дека овде за Тито се зборува без предрасуди“, вели Брезовец.Продуцентот за Македонија Гоце Димовски, смета дека проектот нема политичка позадина и се надева дека до март идната година кога ќе финишираат работите ќе се надминат недоразбирањата со власта. „Мислам дека ништо баш идеолошко или политичко нема во претставата. Таа е едно иронично гледање на животот и работата на Тито, но ако некој се препознае во тоа, јас не сум виновен“, вели Димовски.

Проектот Тито е мит меѓу театарска претстава и мјузикл. Тој вчера зад затворени врати беше прикажан пред малубројната битолска публика, критичари и новинари. Траеше повеќе од два и пол часа. Ликот на Тито е претставен и како обичен човек со многу маани и доблести. Во исто време се презентираат факти од минатото кои на јавноста долго време не и' беа познати. Изобилува со слободни сцени, голотија и вулгарности, но сето прикажано многу умешно со сценска игра која сепак на моменти се доживува како пародија. Ликот на Тито го толкува битолскиот актер Петар Горко и кој смета дека ова е забавна претстава и само така треба да се доживее. „Не правам филм од целата оваа работа и не се обидувам да го емитирам Тито. Не правам од него лик онаков каков што бил и тој“, вели Горко. Мега проектот „Коски во каменот“ е работен по сценарио на Слободан Шнајдер, во режија на Дејан Дамјановски, Дејан Пројковски и Мартин Кочовски. Како стручен консултант се јавува Бранко Брезовец, а кореограф е Олга Пона. Учествуваат актери од неколку македонски театри. Македонската премиера е најавена за март идната година, а светската за 6 јуни во Хамбург, Германија. (Б.Т.)