Re: Мартин Вучиќ ќе не претставува во Киев / Политика, Свят / Македония

Мартин Вучиќ ќе не претставува во Киев

Ѓорге Стојанов

Мартин Вучиќ со песната „Ти си сон“ (музика - Драган Вучиќ, текст - Огнен Неделковски и аранжман - Дарко Димитров) ќе ја претставува Македонија во квалификациската вечер на изборот на „Песна на Евровизија“, кој ќе се одржи на 19 мај во Киев.

И покрај убедливото водство на Александра Пилева со песната „Сонце и месечина“, сепак, по сумирањето на резултатите, добиени по пат на телефонско гласање, мислењето на публиката во Универзална, како и гласовите на членовите на жирито, кои беа пресудни за победничката песна, на националниот евровизиски избор триумфира Мартин Вучиќ.

Песната на Пилева, која при телефонското гласање доби петпати повеќе гласови, воопшто не беше рангирана меѓу шесте најдобри од претставниците во жирито Никола Фириев и Јошко Бошковски, вработени во МРТВ, а не доби ниту еден глас и од македонскиот композитор и продуцент Роберт Саздов.

Како третопласирана заврши композицијата „Не“ од музичката работилница на поп-дивата Калиопи, а другите песни останаа речиси незабележани.

Во улога на најавувачи на осумте композиции, на сцената продефилираа: Тамара, ѕвездите од „М2“, Искра Џамбазова, Дадар... За време на гласањето, во ревијалниот дел настапија Биба Додева, Тамара, Искра Трпева, Андријана Јаневска и малата Мартина, кои пееја во испразнетата сала, додека публиката им го фаќаше сеирот на двата натпреварувачки табора во холот на Универзална.

Со годинешниот национален евровизиски избор уште еднаш се покажаа неинвентивноста на композиторите и нивниот ангажман по секоја цена императив да им бидат претходните победнички песни на „Евросонг“.

МРТВ како организатор повторно го допре дното, нудејќи катастрофална приредба, со лоша сценографија и крајно недуховита водителска двојка.

Но, она што на завчерашниот национален „Евросонг“ исплива на површина дефинитивно е скандалозното гласање и вистинската војна што се случи меѓу „М2“ и Драган Вучиќ, кои претходно сето тоа го сфатија како натпревар што ќе заврши со победник и, условно кажано, со голем губитник.

За нерегуларноста на изборот прозбореа и повеќе посетители во Универзалната. Едни го искажуваа револтот дека и покрај упорните обиди да гласаат од својот мобилен за песната на Мартин, не можеле да добијат сигнал. Други, пак, признаа дека им биле поделени бесплатни влезници на кои однапред била заокружена песната „Ти си сон“ со која Мартин собра и најмногу гласови меѓу присутните во Универзална сала.

********

Бучковски ја искара Стошиќ

Премиерот Владо Бучковски, кој беше присутен во Универзална, воопшто не криеше дека од својот мобилен гласот го дал за Александра Пилева. Видно револтиран од тенденциозноста на членовите на жирито, тој ја искара директорката на МРТВ, Гордана Стошиќ, за некомпетентниот состав и за скандалозното гласање.

Претходно, за време на манифестацијата, во централната ложа, каде што беа сместени Стошиќ и Бучковски, се појави и Дарко Димитров од „М2 продукција“, кој воопшто не го штедеше својот „сочен“ вокабулар додека буквално и викаше на директорката на националната ТВ-куќа. По завршувањето на манифестацијата, на паркингот пред Универзална сала, Дарко Димитров и се „пушти“ и на мајка му на Мартин, инаку вработена во Македонското радио на националниот сервис.

********

Драган Вучиќ „заработи“ камен по глава

Драган Вучиќ, композиторот на победничката песна и татко на нашиот евровизиски претставник, напуштајќи ја салата од службениот влез, беше и физички нападнат. Еден од навивачите на Пилева го погоди со камен во главата. Тој наместо веднаш да се засолни од толпата револтирани граѓани, возврати и му се нафрли на напаѓачот, при што дојде до вистинска мешаница. Притоа, во обид да му помогне на татка си, и Мартин се обидуваше да ја смири разгневената маса граѓани. Веднаш потоа интервенираше и полицијата, а насобраната маса скандираше со зборовите „мафија, шиткачи, педери...“, која уште долго време потоа остана пред Универзалната сала.