БРОНЗЕНА АНТИЧКА КНИГА ОД ВРЕМЕТО НА АЛЕКСАНДАР МАКЕДОНСКИ ВО РАЦЕТЕ НА МАКЕДОНЕЦ
За старомакедонското писмо Македонија се пазари, а Грците даваат 1.000.000 евра
Бронзената книга на која, покрај старомакедонското писмо што е речиси идентично на кирилицата, испишани се уште линеарното А, линеарното Б, лизиското, микенското и феникиското писмо, за нас е од посебно з
Бронзена античка книга, испишана со повеќе писма, меѓу кои и со старомакедонското писмо, а која е проценета дека датира од времето на Александар Македонски е во сопственост на еден Македонец, кој инсистира да остане анонимен. Бронзената книга, освен тоа што на овие простори е единствена и досега не е познато дека постои друга, за нас е посебно значајна затоа што на неа е старомакедонското писмо, речиси идентично на ова со кое ние денес се служиме - кирилицата. Книгата, всушност, докажува дека писмото постоело дури петнаесетина века пред појавата на Кирил и Методиј. Наши археолози велат дека вакво старомакедонско писмо пронашле и нивните грчки колеги пред деценија - две, некаде кај Пела, а било испишано на керамички таблици, но тоа Грците го чуваат во тајност. Керамичките таблици со старомакедонско писмо се скриени длабоко во трезорите на Атинскиот музеј.
Книгата има четири бронзени листа, од двете старани испишани со писмо и исцртани со знаци. Листовите биле поврзани со кожа, а на насловната страница има украсна апликација. Во книгата се испишани шест писма, и тоа: критските линеарно А и линеарно Б, лизиско, микенско, феникиско и старомакедонско. На неколку места може да се прочита името Александар, а од знаците има исцртано многу сонца и еден клуч.
Сопственикот, бронзената книга ја поседува веќе дваесетина години. Знаејќи ја нејзината важност, тој, по осамостојувањето на Македонија, се обидува да и ја продаде на државата, но никако не успева ни со претходната ни со сегашната власт да се договори за цената.
Преговорите за откуп започнале кога на власт беше СДСМ. Сопственикот дошол во Скопје со снимен видеоматеријал и со фотографии и им го покажал на стручњаци од Републичкиот завод за заштита на спомениците. Тие, откако ги проучиле, констатирале дека книгата е оригинал и, по силата на законот, постапиле како посредници помеѓу сопственикот како продавач и државата како купувач на книгата. Сопственикот првично побарал 40.000 марки, а кога државата се согласила на таа цена, тој, се чини, сфатил дека побарал малку и ја покачил цената на 60.000 долари. На државата тоа и биле многу пари, па му понудиле да му ги вработат двајцата синови и да добие парична награда од 30.000 марки, но сопственикот не се согласил. Тука преговорите пропаднале. СДСМ потоа ја загуби власта, а дојде новата, на чело со ВМРО - ДПМНЕ. Преговорите за книгата со новата власт сопственикот ги водел со Мартин Треневски, додека овој беше министер за иселеништво. За преговорите со новата власт цената рипнала веќе на 500.000 марки. Треневски, нормално, одбил да се дадат толку пари оти, веројатно, за државата овие пари биле многу, и му понудил 100.000 марки. Овие пари, пак, за сопственикот биле малку.
Во меѓувреме, додека државата и сопственикот се погодуваат и прават држ -не дај околу цената, којзнае како Грците дознаваат за постоењето на оваа книга. Го наоѓаат човекот и, како што вели тој, му нудат 2.000.000 марки само да ја добијат книгата која, најверојатно, потоа би ја снашла судбината на глинените плочи. Со ова, повторно би се загубила трагата за докажување на постоењето на македонската писменост, која можеби е постара и од сите грчки писма, вели сопственикот на бронзената книга. Затоа тој како Македонец и патриот не им ја продал на Грците , но за "Вест" вели дека доколку оваа држава не сака да ја даде вистинската цена за неа, тој тоа и ќе го стори.
Стручњаците велат дека од фотографии и касета не може добро да се одгатне што пиушува во книгата, зашто е пишувана кружно и без некој посебен ред, туку треба да се има оригиналот. Но, сопственикот оригиналот никому не го дава да го види. За местото од каде потекнува оваа книга, сопственикот, исто така, не сака точно да каже. Како и со парите, си игра и со приказната од каде ја нашол. Еднаш вели дека е најдена под некоја воденица каде имало тунел низ кој се доаѓало до просторија во која била книгата. Вторпат дека е извадена од пештера на Кожуф. Пештерата, вели тој, била идеално работена со кружен таван и под, од старните од камени блокови имало изработени седишта, а на нив стоела книгата. Третата приказна, пак, е дека бронзената книга, всушност, ја нашол некој поп на Родопите во пештера. Влезот на пештерата бил под водопад, а до просторијата каде била книгата се одело низ некој тунел. Сегашниот сопственик ја купил книгата од попот. Во сите три различни приказни, едно е исто - дека таму каде што е најдена има и други вакви книги, односно дека постои цела античка библиотека. Е.Оровчанец - Спироска
|